ЧеалкIуси наслулис чихъси гIибратли калунси
Бара гьалабван "Россия – дила тарих" парк-музейлизиб пачалихъла хIяракатчи, пасихIси ва гъабзадешчевси гьарли-марси Дагъиста патриот, Пачалихъла Советла председатель МяхIяммадгIяли МяхIяммадович МяхIяммадовличила «Дагъиста пахру.
МяхIяммадов МяхIяммадгIяли МяхIяммадовичличила гьанбикуни» бикIуси жузла презентация бетерхур. Балбуцличи бакIиб Россияла Президентла администрацияла руководительла заместитель МяхIяммадсалам МяхIяммадов, ДР–ла Халкьла Собраниела председатель Заур Аскендеров, депутатуни, жамигIятла хIяракатчиби, гъамти-тухумти, юлдашуни, журналистуни ва цархIилтира.
Жузла авторти ва сиптакарти саби Хасбулат Рустамов, Алла Умарова, журналист Мурад ГIяхIмадов. Жузлизир цаладяхъили сари иличил барх бузули калунти бархкьябала, юлдашунала ва ил валутала гьанбикуни. «Дагъиста пахру» бикIуси жузлизиб республикала ва улкала тарихла бутIа чебаахъили саби. Къиянти имтихIянтачила ва дарсдешуначила балахъули саби. Лерилра гьанбикуни илала пасихIдешличи ва санигIятлис мардешличи хIурматли ва хIяйрандешли дицIили сари.
Халкьла Собраниела председатель Заур Аскендеровли Дагъиста бекIла шайзирад цалабикибтас саламти дуриб. Жузличила бурули, илини чула гьанбикуни датуртас баркалла багьахъур. Илини республикала тарихлизирти мягIничерти бяхIяни гьандушиб. "Илини Дагъиста ва Россияла тарихлизир дебали мягIничерти къел датур. Дагъистан чIумасили ва цасили калахънилизиб М. МяхIяммадовичла кьадричебдеш халаси саби. Ил - республикала пахру сай. Илала сархибдешуни, республика гьаладяхI арбукес ва вавалибяхъяхъес дирути къайгъни дебали мягIничертили кавлули сари чеалкIуси наслулисра", - буриб Заур Аскендеровли.
Сценаличиб гъайбухъунтани илала адамдешла къиликъуначила, гъабзадешличила, чIумадешличила, республика берцахъес багьандан буресагарли халаси пай кабихьниличила ва гьалабизуначи хIерхIеили узниличила буриб.
ЖамигIятла ва политикала хIяракатчи Людмила Авшалумовала гъай хIясибли, ил пергерси гьанбикунала жузли бучIантала уркIбачи гьуни бургу. "Автортала коллективли дураибси жузличи пахрубирули дигулра, нушани нушала МяхIяммадгIяли МяхIяммадович левниличи пахрубирули кьяйда", - рикIи ил.
М.МяхIяммадовичла урши МяхIяммадсалам МяхIяммадовли лебтасалра баркалла багьахъур сунела дудешличила гьанбикуни мяхIкамдирнилис.
М.МяхIяммадов Пачалихъла Советла председательли ва Россияла Бузерила Игитли вирусири. Илини республикала жамигIятла ва политикала гIямрулизиб бекIлибиубси мер буцибсири, илкьяйдали Дагъистайчи чебухъунти халкьани-ургарти къачагъунала кьукьни дугIаънилизи халаси пай кабихьибсири. Жан ахIерахIедирули ВатIайс къуллукъбирни илала гIямрула бекIлибиубси мурад сабри. Илини улкала цадешлизи ва Дагъиста халкьанала бархбасуни чIумадарнилизи буресагарли белгиси пай кабихьиб.
Адам гIямрулизивад арукьни - илала гьуни таманбиъни ахIен. МяхIяммадгIяли МяхIяммадович мицIирли сай иличила гьанбикуни лералли, илала пикруми ва баркьудлуми халкьла уркIбазир калунхIели. Нушани гьачамалра хъумхIертехIе нушала республика гьалабяхI аркнилизи ва Дагъиста ванзаличиб даршудеш ва цабалгундеш калахъес багьандан илини кабихьибси кьадричебси пайличила.
Дагъиста халкьлис ил мицIирхIелира дигахъусири ва гьаннара иличила шалати гьанбикуни дихIес даимбирули саби.
