Цаибил мер
Школализиб «Къияндешлизибти халкьлис кумекбирни» бикIуси уличил конкурс бетерхур. «…Цаибил мерлис приз бедлугули саби Аслямлис! КIиибил мер сархули сай Рашидли! ХIябъибил – МяхIмудли! Тиладибирулра хIябалра сценаличи абацIахъес ва чула шабагъатуни касахъес», – зайбухъун сценаличибад тIама. Аслям сунела мерличивад айзурли сценаличи гьайвиуб. Лебилра иличи хIербикIулри ва хъатбикIулри. Илини сунела шабагъат сасили, хIурматла гIяхIялла някъ буциб ва сунела мерличи чарухъун. Тяп илкьяйдали бариб Рашидлира МяхIмудлира.
Ил сабри актовый заллизиб дураберкIибси гъайла журала балбуц. Илдани пикри бяхIчииулри къияндикибси мерлавсилис къуллукъ гIеббиахъниличи ва кумекла някъ гьабалтниличи. Лебилра бутIакьянчибани ил темаличил дархдасунти чула хIянчурби делчIун ва жюрили бегIлара гIяхIил гъайбухъунти хIябал чеббикIиб.
Рашид дебали разилири ва хъули ваэс къалабаикIулри, разиси хабар бегIтази ва узи-рузизи багьахъес. Балбуцла программа таманбиубхIели ил къалабали дуравхъун.
Рашидли сунела велосипед гьайбариб ва светофорличи каиб. Ил тIашизурли левли, мякьлав гьести гIямрула мурул адамра велосипедличив вакIиб. КIелра светофорличиб шиниша шала абалкахъес хIерлири. БухъутIа шала шинишаличи шурбухъес хIядурси манзил мякьлабад ухъначи къячбики мотоцикл шалгIеббухъун. Ухъна кайкиб. Мотоцикличивсилис Рашид сунечи хIерикIули чеиб, амма ванзаличивси мурул адамра ватурли арякьун. Илала кьяш изиаурлири, Рашидли илис кумекбариб. Ахъуцили, сунела мерла илра ваахъили, Рашид хъули арякьун.
Лебил разидеш бегъуб, ва ил хумарли хъули чарухъун. Илини кIиибил мер сархниличила бурибхIели лебил тамашабиуб. Дудешли ил уркIичевварес кьаслизиври:
– КьакьамайкIуд, урши! ГIурхIели ГьатIира гIяхIли къайгъибара. Ил хIезибад саби дигахъуси.
Нешлира ил гIеввуциб:
– Селра хIебирар, ахIерси! ЦацахIели илгъунара бирар. Цаибил мер ца саби бируси ва лебтасалра биркуси ахIен.
– Ну мер багьандан ахIенра пашманси. Ну хъули чарулхъухIели набчил хIейгеси анцIбукь бетаур. Ва илини кабикибси анцIбукьличила буриб.
– БегIлара хIейгеси биалли мотоцикличивси Аслям сайри, суненира цаибил мер сархибси! Ил хабарли лебилра тамашабариб.
Нуша школализир цаибти мерани сархес къайгъи-лизирхIели кьяйда, тяп илкьяйдали нушала баркьудлумира нушала гъайличи мешутили диэс гIягIнити сари. Ва нушала хасиятунира хIял-тIабигIятра гIяхIдарес къайгъибарес. Гьести гIямрула адамтала хIурмат бирес, къияндикибхIели кумек гIеббиахъес ва багаладирес. Или хIебиалли дуцибти мераназибад сегъуналра пайда агара.
