Сабур – Алжанала умхьу
Сабур Алжанала умхьу саби. Ил дакIубирусила лерилра секIал ункъли детурхар. Амма гIергъиси замана, нуни чебиуливан, бахъалгъунти адамтала ил каберхурсигъунти аги-кьяйда сари.
ХIял гьалакси, селра пикрихIебарили, хъярхъли жиндлавируси адамлизи маслигIятбирули бирар сабурбарахъес. ИшбархIи биалли, илкьяйда или лебтазилра маслигIятвикIес чевкъар. Гьайгьайрагу, алавчарли кадиркути анцIбукьунанира бахъалгъунтала сабур кабурхахъули саби, дигалра-хIейгалра сабурлизибад булхъули саби. Пашмандешла, декIти анцIбукьуни пикрилизи кахIесес хIейрар, илдани сен-биалра адамла дагьриличи вайлашал халаси зарал бетарахъули саби. Амма, чебиуливан, гIясивиубли, вявикIули хьалли, халаси-декIар барсдеш алкIули хIебирар. Ил багьандан гьарил баркьудилизир сабурчебрдеш дакIудирес чебиркур.
Шагьарлизи дураухъалли, сабурагарти адамти бахъал къаршибиркули бирар, хаслира шагьаркад дикути машинабала бегIти-ургаб. БегI гьалабси яргализиб, гьанбушес вирар маршруткабала шоферти. Ца минутлисалра чус гьалабухъунси цархIил маршрутка илдани хIебалтусиван кабилзан. Цалис ца бястлизи кабизурли, адамти тIашбизурси мерличи чидил гьалав виурал абзлизиб бирар, илхIелира я цали цалис, я алавчартас гьуни хIелугули. Илдас гIелакабулхъули хIебирар диштIати машинабала шофертира. Чус гьалаб бара багьлали вашуси чеваалли, хасси тIамара дарили, сабурагарли илис гьалабулхъан, хъярхъдешра имцIабарили. Амма гьалаб лебси свфетофорличиб тIашбилзан, багьлали вашуси шоферра илис гIевиур. ХIебиалли, се барес илдигъунти авара дирутири, сай илцад-декIар гьарахъли аркьули хIейалли? Ил сабурагардешла бегI гьалабси лишан саби.
Буралли, нушала дубурланти итира хIял гьалакти, баркьудилизиб хъярхъти адамти саби. Биалра, илдигъунти анцIбукьуназир ва цархIилти декIар-декIарти аги-кьяйдализир сабур дакIубиралри, гьатIира илдала хIурмат-кьимат ахъли дири ва сари-ургарти бархбасуни кIинали уржибтили детари.
Нушаб къайгъибарес гIягIнили саби сабур дакIубареси мерличир гьалакхIедирес, ца хIяжатагарси баркьудили алавчартала уркIбира хIедумкьахъес. ИлхIели лерилра секIал ункъли дирар.
