Россия гъармука улка ахIен
Нушала улкали Украинализиб дурабуркIуси дявила хасси балбуц 1941-1945-ибти дусмазиб Германияла фашистуначил кабикибси нушала ВатIа ЧебяхIси дергъичиб бухъянбитIи саби. Ил багьандан ургар Россияла Президентла пресс-секретарь Дмитрий Песков илис «нушала улкали Украинализиб дурабуркIуси дявила хасси балбуц ахIенну, ил лерилра Европала улкнала Россияличилси цахIнабси дергъ саби» викIуси.
Вархьли викIули сай Путинна пресс-секретарь: далдуцуни авалра байхъалара дус кавлути ахIен. ГIурра чум дус кавлусил ил дергъ балусира агара. БегIлара халати ва цIакьти Европала улкнала бургас ил дергъ таманбарес гьеч дигули ахIен. Илди хIядурбикIули саби челяркьути дусмазиб Россияличил сабира дергълизи кабухъес, ил багьандан имцIадирули сари чула ярагъладарибти цIакьани. Россия чучи чебулхъуси саби бикIули, дявиличи чула халкь хIядурбирули саби.
Нуни бакьибси саби ца ишгъуна секIалра. 1945 ибил дусла майличир Георгий Жуковли дурибтири, бикIар, ишди дугьби: «Нушани Европала халкь Германияла фашистуназибад азадбатурра, амма ил барнилис илди нушаб баркалла хIебикIар: илдас илгъуна азаддеш гIягIнили буили ахIен».
Гьарли-марли, гIягIнили ахIенси секIал буили саби Европала халкьанас илгъуна азаддеш.
Бархьли бурасли, нуни ил секIал аргъес вирули ахIенра. Пачала хIукуматла заманара Россияла гIярмияли Турциялизирад далтахъутири Европала цацадехIти улкни. Мисаллис бурасли, Болгария. Гьанна Болгария Европейский Союзлизи каберхурси улка саби, ва илра Россияличи къаршили саби. Тамашала анцIбукь ахIену ил?! Пикридухъеная гьари, ахIерти гьалмагъуни.
Сен бусягIятла заманалра, 21 ибил даршдуслизиб, агартив Европала улкназиб чула челябкьлаличила пикрибикIес балути, духути адамти? Сен илдани илцадра жявли хъумуртуси чула улкнала тарих? Сен хъумуртуси илдани, се бетаурал Россиялизи дявиличил дакIибти Наполеонна ва Гитлерла гIяскуртас?
Багьес замана баилигу илдас, Россия гъармука улка хIебиъни. Се дирути нушаб Европала ванзурби, «Игитунала замана» программализив В. В. Путин викIуливан, нушала ца регионни бируси Якутияла ванзаличи гехIел Франция кадурцули диалли?
Россия гъармукаби улкни дялчIуси улка саби. Европала Созла Россия бячIес яра усалбушес гьунар биуси ахIен, Россияли биалли ил дунъяличибад беткахъахъес бирар.
