ХIижаб бихнила 10 сабаб
Чумал дус гьалаб нуни хIижабла мягIна гьаргбарира, ва ЧевяхIсила уркIецIиличибли гьанна разидешличил ил бихулра. Иш белкIлизиб нуни бусурман хьунул адамтани хIижаб бихнила сабабтачила бурис. Рирхулра ишди баянтани цархIилти рузбира илгъуна баркьуди дураберкIахъес уркIичеббиру.
Се саби хIижаб?
- ХIижаб – ил ЧевяхIсила, зубрала ва ванзала ВегIла чараагарси хъарбаркь саби.
- Гьар секIал ЧевяхIси Кьудратла ВегIли нушазирад тIалабдирути, нушаб гIяхIдешлисцун сари, нушани гьачамлис тамай аргъили хIедиахIеллира. ХIуша тухтурличи дякьунхIели, дирхаурли, илала хъарбаркьуни тамандирулрая, хIушаб хIейгуси кьутIкьуси дарман лугухIелира, сенкIун хIуша дирхулрая илини арадеш къулайбирниличи. Сен нуша нуша акIахъубси ЧевяхIсиличи хIедирхес гIягIниси, Илини нушачи се-биалра хъарбирухIели, илхIелира нушаб гIяхIдешлис?
- ЧевяхIсиличи хIуша гъамдарес
багьандан бируси бегIлара мягIни-чебси секIал саби – мутIигIдешличил ва умуси уркIиличил Илала хъарбаркьуни гIямрулизир дурадуркIни. ХIижаблизир хьунул адамлис дахъал гIяхIдешуни лерти сари. Нуни илди итмаданал аргъира ва ряхIятдешла гьавли ну итхIейчирад рархьралтули ахIенра.
- ХIижаб – ил хьунул адамлис рухIласи шала саби, ва илини илала рухIласи шала имцIабирули ва мяхIкамбирули саби. ХIижаб ил иманна лишан саби. Ил хьунул адамличи ЧевяхIсила бегIлара халаси уркIецIила лишанра саби.
- ХIижабли цIакьдешла гьав лугули саби. Чисалра илала кьаркьала чебиули ахIен, гьар секIал кIапIли сари, урхIла мурул адамтала ва цархIилталара хIераназирад пардавли кIапIрарили, мяхIкамрарили сари. Иличибли ЧевяхIси Аллагьли ﷻ хьунул адам черяхIрарили, ралтахъули сари.
- Бусурман хьунул адамлис асухIебирар модалис ва цархIилтани жагасилизи халбирусилис гIеларад рашес. Илини цархIилтала гIердирес гIягIнидеш агара. Гьанна бахъалгъунти модельертани, дизайнертани ва модалис хасдарибти юртанала бегIтанира дахъал имцIати секIал агарти, гIядатлати палтарличи пикрибяхIчииули саби.
- ХIижабли кумекбирули саби хьунул адамла куц-кабизличи пикри бяхIчихIейахъули, илала гIякьлу-дагьриличи ва пагьмуртачи пикрибяхIчииахъес. Иличил бузутасра бархли ил халаси кункдеш саби, бегIлара мягIничебси – хIянчи цаибил мерличиб чебаъни.
- Нушала кьаркьала – ил аманат саби ЧевяхIсини нушази бихIяхъес гибси. Нуша заманалис сарра ил чархлизир хIердирути, ил багьандан нушачи ЧевяхIси Кьудратла ВегIли хъарбарибси кьяйда ил мяхIкамли бихIес чебси саби.
Медицинала шайзибадси хIижабла гIяхIдеш дунъяла машгьурти гIялимтанира кабизахъурси саби.
- Хьунул адамти урезичебтили бирути саби, амма илгъуна тяхIяр лебтанилра бузахъес чебиркур. ГIядатла палтарличил бегIбиубти хьунул адамти чебиухIели, мурул адамтани хIулби гIяшдурцули – илкьяйдали цали цалис кумекбирес. Ил тяхIярли жамигIятлизиб адабчебдеш ва цала цали хIурматбирни кавлуси саби.
- Лерилра динничил дархдасунти секIал – ЧевяхIсила хъарбаркьуни сари, нушала даража ахъбурцути. Хьунул адамла хIижаб – ил илала жагадеш ва мяхIкамдеш, илала цIакь ва ярагъ, илала адаб-хIяяла, рухIласи ва иманна лишан саби, ил рирхни чебаахъни саби.
Лерилра ЧевяхIсила хъарбаркьуни дурадуркIни – ил чеасла саби нушала гIямру мягIничертили, сабухъчертили ва даража ахъсили диахъес багьандан.
