Имам Абу ХIамид аль-Гъазали
УчIанничи кагъар
Урши, насихIят бурес гьамадси саби, амма ил кьабулбарес къиянбулхъан, сенахIенну ил кьутIкьусин кабилзан сунела хьуланас гьуни бедлугусилис, уркIилис къадагъаласи дигухIели. Хаслира багьуди касили хьалли нафслис гIелавад вашуси ва дунъялизи вархибси. Илала пикри хIясибли, багьудили ил уцахъу, Жагьаннаблизивад акьувалта ва гIяхIти баркьудлуми дирес хIяжатдеш агара. Аллагьу акбар! Илис балули ахIен илди багьудлуми хIясибли вяшхIейкIалли, ил сунечи къаршиси далил биъни. Аллагьла Расулли ﷺ бурни хIясибли:
"Кьиямала бархIи хIушазивад бегIлара дебали инжитвирар, сунес Аллагьли ﷻ дедибти багьудлуми пайдалахIедарибси".
Урши, мяхIкамдешбара гIяхIти баркьудлуми ва сегъуналра даража агарли калнилизибад, багьи, багьудлумани сари сарил кумекхIебирни. Илис мисалли вирар чIянкI авлахъличивад аркьуси адам, сунечир индияла 10 турл ва цархIилти ярагъ лерси. Иличи халаси ва цIакьси арслан чебухъалли илдани ил валтахъув сунени бяхъес тур ахъхIебуцалли? Балуси саби илдани берцуди бируси саби ахъбуцили вирхIухIели. Тяп илкьяйдали адамли 100 азир гIилмула суал делчIи дагьалли, амма илди гIямрулизир пайдалахIедиралли, илис гIяхIдеш хIебирар.
ГIурара ил цугбуцес вирар адамличил, бухъутIа изай уцибси, ахъси температураличилси. Ил изала сагъбарес вирар варъаличил, цIакьдарибти кьанцIаличил ва цархIилти дармунтачил, амма гIяхIдеш агара илди пайдалахIедиралли.
Урши, хIуни гIяхIти баркьудлуми хIедирадли, шабагъат сахIерхид. Бурули саби, Исраиль кьамлизивадси ца адам ЧевяхIси Аллагьлис ﷻ 70 дус гIибадат бирули кали сай. Аллагьлис ﷻ дигиаурли саби ил малаикунала гьала кес. Аллагьли ﷻ малаик иличи вархьили сай, сунени гIибадат бирниличи хIерхIеили Алжана сархили ахIен или илизи бурахъес. Иличи ваибхIели лагъли буриб:
"Нуша гIибадат бирахъес сарра акIахъубти, ва нушани гIибадат бирес чебси саби".
Чарухъи малаик викIар: "Дила Аллагь ﷻ, ХIед гIяхIил балад илини бурибси". ЧевяхIси викIар: " Эгер ил Нушаб гIибадат бирнилизив гIелумилзули хIейалли, Нушала уркIецIиличибли ил вархьхIелтехIе. Малаикуни, бикьридеш дарая, Ну иличивад чевверхурра".
