Шанданван чIуматили диаб!
Хъалибарг – адамтала кьукья саби, сабира цаличил ца цIакьли бархбасунти. Хъалибарг адамла гIямрулизиб бегIлара мягIничебси саби: гьаланачиб сай акIубси, кIинайс - сунени алкIахъуси.
Хъалибарглизиб адамли къакъбяхъ, кумек, балгундеш, диги дургу. Хъалибарглизив бегIлара ахIерси адам, дила пикрили, виэс гIягIниси сай вегIла гIямрула юлдаш, сенахIенну дурхIни сецад ахIерли биалра, халабаибхIели илди хъулибад дурабулхъан, бегIти цунбулхъан. Илдас чевкъар цали цала уркIи иргъес, цали цала хIурматбирули, даршули хIеркабиэс. ЗягIипбикибси манзил сагъбиахъес кумекбирес, цундешлизи хIебиркахъес. Мурул-хьунул даршули хIербиралли, хIерикIусилара уркIи разили бирар. ВегIра ухънаваибхIели илкьяйдали вяшикIес дигули айхъур. Дила дебали иштяхIдулхъи нушала шилизиб хIербирули калунти МяхIяммадхIябибличи ва Хамисличи. Илди барх бухънакабаибтири. ХIеркабирутири дурхIначибад декIарли, кIелрацун. ГIямрула гьунчир чедаиб илдани сегъунти-дигара къияндешуни, жагьил замана дариб хатIаби, амма секIайчи хIерхIеили, барх калун. БехIемцIлизи рикили гIергъи рашес къиянбулхъули, кIинайс бекIлил рашес хIериранриубсири Хамис, МяхIяммадхIябиб биалли, хъумачив узуси, бажардила вегI адам вири. ХIера, зягIипси хьунуйсра сунесра беркала барили варх укусири ил. Дудешли МяхIяммадхIябиб нушачи кибси замана, дила хуху рахес гIягIнили сабину, вахъхIи кайэс бетхIерар или викIи, баркалла багьахъурли, разити дяхIличил арваши. Шилизив гьарилтас гьаниркур ил гIяхIси, разиси, масхуртар адам кьяйдали. Гьанналауб илини чилра гьимукIахъибси яра илини вай барибси адам левсири или бакьибси ахIен. ГIягIниси мерличиб кумекбири, насихIят гIеббури. Хамис дебали жагаси, булбул чатIалагъуна тIамаличилси хьунул адам рири, сарира жагали далайрикIуси ва мурхьси мягIналичилти назмуртани лукIуси. Дахъал-декIар секIал илдачила хIедаласлира хъалибарг ибхIели илди гьанбушес дигиаур, сенахIенну илди кьяйдали барх бухънакабаибти цархIилти наб гьанхIебиркур, имцIаливан къаршибиркур хъалибарглизивад цацун, цархIил ахиратла хъули арякьунти. ХIера, даршули хIеркабирути илди тIягIямагар коронавирусла изай декIарбариб. ЗягIипикили сагъварес хIебиубли МяхIяммадхIябиб гIямрулизивад шалгIевухъун, Хамис рурсили сунечи аррукиб. ВебкIибси муруйчила цахIнабяхъибси Хамисла назму белчIунсила уркIи дебали кьакьабулхъахъи. Камси заманала рухIнар илра цIябси хIябла караркьиб. Аллагь ﷻ бунагь-хатIаличивад чевкархурли, Гьалжанала унза гьаргдараб чус. Дебали балбикибти мурул-хьунул бири илди. Бунагь агарси, гIямрулизиб хатIа хIебарибси левси ахIен. Амма илдачира някъ чекабихьили, варх хIериэс виънира кьиматласи баркьуди саби. БиштIаси секIайчи баили хъали-цIа пашделхъахъути анцIбукьуни камли ахIен,ил багьандан илала шайчиб МяхIяммадхIябибла хъалибарг гIибратласи саби или наб гьанбиркули саби. ЗягIипли сарину хIерэс хIейрус, хIушачи аррукая или дурхIнази хIеили, сецадла къиянни биалра сунени хIеркарариб ил. Баркалла биаб сунес.
Ахирличиб бурес дигулра, дуцибти гьарилла хъали-цIа шанданван чIуматили диаб. УркIбазир цаличи цала диги каммадиаб. Цалис ца кумекличи, къакъбяхъуни диабая. Цундешра гьими-кьясра дагьмадагьабая. ЛебалцадхIи иш дунъя, гIямру шадли деркIабая.
