Халкьла бетаурли дигахъира
Гьава, берхIи ва урхьу - нушала юлдашуни. Илгъуна жи лебсири пионертала лагертазиб бамсриихъути СССР-ла дурхIнани бурули. ИтхIели хIукуматли сунела халкьла арадеш мяхIкамбарес кумеклидирути курортуни, санаторийти, бамсриихъути мер-муса (зона) урхьула, хIуркIбала, умути шинна, мургьирангти гъумла мякьлар, тIабигIятла бегIлара жагати мер-мусаличир акIахъубтири. Илдазиб бамсриихъули улкала халкьли, биштIа-халатани чула арадеш къулайбирусири.
Гьанна, нушала наслули, илди лерти диъниличила хъумартес замана баили саби, жагьилтани биалли илдачила селра балулира ахIен. Илдани балуси бамсриахъес дигусилис, урхьула дубличиб дуги беркIеси мер, шел азир къурушличи абиркули биъни саби. Багьа агарли, гIядатла адам вякьи кайэс, бацIси урхьу дубра кали ахIен. Шагьуртачи, шимачи гъамти мер-мусаличибси урхьула дуб вегIдешла бетаурли саби, цацахIели, бамсриихъути бахъбаибхIели, урхьула дубла кайэс мер, арцлис асесра биркули ахIен.
Шагьарла адамти багьа агарли букьес бируси урхьула дубларти (пляжличирти) гъум, башути адамтала бахъдешли, кьяшмани ганздарили гIянжиличи шурдухъи сари. Илала дурабадра, лебтанилра балули саби, шагьарла нясдешуни урхьулизи дашули диъни, урхьула шиннизив вазес арадешлис урехиласи биъни.
Нушала республикалис МяхIяммадсалам МяхIяммадгIя-лиевич МяхIяммадовли бекIдеш дируси замана, республика гьалабяхI арбукести дахъал далдуцуни дехIдуцибтири. Илди далдуцуназибад ца сабри МяхIячкъалализибад югла шайчибяхIси авлахъличиб немецуналайчи мешуси, сагаси ши белшни. Сепайда, илала гIяхIти пикруми детерхахъес имканхIебакIиб, илини сунела бузери Москвализиб даимбариб, нушала республика биалли, яргали башути, чула кисмачила пикрибикIути адамтани, баркьагарти хIякимтани цалра шайчибад гьалабяхI хIебашахъули тIашкаиб.
Баягъи, ил немецунала ши барес пикрибарибси мерличи бяхIчили дебали жагаси, умуси урхьула дуб леб. ДуцIрумла замана, акьути бурхIназиб хаслира ила бахъал адамти бамсриахъес башули саби. Илаб урхьула дубла машина тIашкаэс бетарули саби. Урхьу халаси мерличиб сяйли саби, дурхIнас урхьулизи бетацIес урехиласи мер ахIен.
Наб ил мер, вегIдешла бетхIеахъурли халкьлис калахъес дигулра. Илар дарес дехIдуцили дахъал секIал (стройка) чедиур, дузули техникара лер, ил мер жявлил асили, вегIдешла бетаурли биэсра асубирар. Урхьура гIелабяхI арбякьи саби. ХIера, ил гIергъиси замана шин ардякьи дакIубиубси урхьула дуб, халкьлизи бамсриахъахъес калахъес дигулра наб.
Рахли нушала газета бучIантани, республикала хIякимтани дила пикри гIеббуцалри, илаб дуцIрумла замана халкьлизи бамсриахъахъес дебали жагаси мер бетари.
Дила пикри бетурхниличи халаси-декIар бирхауди лебли хIебиалра, бучIантази иличила бурес хьулрухъунра, нуван бахъал цархIилтира илкьяйда пикрибухъалли, белики, бетерхес халкьла пикри…
