ДугIли харждирути гIямру
ГIергъити дусмазир адамтала имканти багьесли имцIадиуб ва лебдешла, мас-мулкла шайчибси агира къулайбиуб. Хаслира ил тяхIяр чебаэс вирар бизнеслизи бархибти адамтала.
Бизнеслис ишбархIила манзил бягIуси гьуни леб ва жура-журала имкантира дакIудиубли сари. Адамтас гьар шайчиб гьалабяхI башес ихтияр леб: туризмализиб, фермерстволизиб, косметологиялизиб, пекарнялизиб, дигалли кондитерли бузули. Унхъри удатурли, сабухъ бурчули, мицIираг адилкьули, ванза бузахъули, гIяхIли ва туристуни кьабулбарес хъулри тIашдалтули гьарзали хIеркабирес бирули саби (ишар гьанхIедушибти дахъал цархIилтира санигIятуни лер). «ХIериэс дигалли, ласикIесра бален», бикIуси буралализиб кьяйдали бетарули саби. ВегIла се гIяхIил бетарулил хIеризурли, сегъунти устадеш лерал, селизиб пагь лебал, се балуси лебал пикрибарили, уркIилис кьабулси ва вегIличи балбикибси бузери чеббикIес вирули сай.
Республикализир дузути программаби ва проектуни хIясибли, пачалихъла шайзибад кумек касесра вирули сай, бизнес бехIбихьес багьандан ва ил журала кумек гIяхIси икьалали бирули саби сай-вегIси бузери бехIбихьес багьандан. Адам левгIев азгъинсицун хIейалли, гъайла къантIа, агри агарли хIериэс вирули сай ва сунела наслулисра се-биалра гIелаб батесра балли.
Амма цацабехIти адамти леб селра барес хIейгути, я барес хIебалути ва селраличи бурсибиэсра бархли хIейгути. ИлхIелира илди чичибалра вайтIа хIербирули ахIен ва ил тяхIярли бурсибиубли саби, чула гIямрулизиб селра барсбаресра кьас агара. Секьяйда или хьарбаадалли, ил дигIяндеш ахIен, илдани чусра биштIатасра пенсияби ва пособиеби кайсули ряхIятли хIеркабирули саби. Ишар гъай Президентли кадизахъурти пособиебачила сари ва къалпти чулахъдешла пенсиябачила. Илдира кайсули хIеркабирули саби селра бирусира агарли. ИлхIелира савли хурегли букесра бархли кафелизи башули саби, ва иличила пахруличил лебтазилра бурули саби. БиштIатас кайсуси пособие илдас багьудила ва бяркълашал харжбаресра балли хIебалули гIягIниагарти секIайс белгъули саби. Пособиеби имцIали кайсес багьандан декIарбикибтира анцIбукьуни дирули сари. Адамлис дедибти гIямрукIун цайнацун сари ва илди лайикьси тяхIярли деркIес гIягIниси саби. БиштIатира багьуди ва бяркъ агарли дугIла хIязаназиб батес асухIебирар, чус дигута биркьахъули ва чус дигути исули. Илдази вайси-гIяхIси багьахъес чебти бегIти саби. Илкьяйда дугIли гIямру дуркIутала наслуличи се хIерли вара?..
