Баракатчебси баз
Ассаламу гIялайкум ва ряхIматуллагьи ва баракатугьу!
АхIерти узби ва рузби!
Деза биаб ЧевяхIсилис, нушаб Рамазан баз савгъатбарибси - баракат бурхьуси ва бунагьуначивад чевурхуси баз. Рамазан - лебилра бусурмантас бегIлара мягIничебси ва хIурматла баз саби.
Гьарил вирхусила уркIилизир "Рамазан" ибси девли хIялумцIнила, гIибадатла ва ахирагарти шабагъатунала баз биънили, разидешла ва хIулбукIрила хIялани алкIахъули сари. Илдала кьадри-кьимат чIянкIли УркIецIичевси Аллагьлицун ﷻ бала.
Деза Аллагьлис ﷻ, гьар дус бирхутала лугIи имцIабирули саби, чулира бирхаудиличил ва мукIурдешличил Рамазан базла бурхIни дуббурцули, дугурби гIибадатлизир дуркIути. Амма кавлули саби абзур баз яхIбуцес хIебирнила урехили, дуббурцес бехIра хIебирхьути. Илдази чараагарли гьанбушес чебиркур Идбагла ﷺ хIядис сунезибра буруси: "Чи ца бархIи дубуцалра, ЧевяхIси Аллагьли ﷻ илала ва Жагьаннабла ургаб хандакь биру, ванзаличибад зубрачи бикайчи гьарахъдешла", (ат-ТIабарани).
Багьирая, дуббуцарла гьарил секундлис хIушани Аллагьличибад ﷻ шабагъат касес дирудая, сабира иш дунъяличибси селичилра цугбуцес хIейруси.
Ил базлизир нушани къайгъибарес чебиркур гIяхIси шайчи дарсдирес, цаличи ца къайгъичертили диэс, хаслира нушала кумек ва хIеруди хIяжаттачи.
Аллагьла Расулли ﷺ буриб: "Рамазан базлизив Аллагьла ﷻ шабагъатличи бирхаудиличил ва умутличил дубуцибсила гьаларла бунагьуначивад чевурхар" (аль-Бухари,Муслим).
Ну дебали вирхулра, нуша лерилра ЧевяхIси гьаларла бунагьуначивад чевурхутала лугIилизи кадурхниличи ва нушала дуббуцари кьабулдирниличи вирхулра.
Лебилра бусурманти дурхъаси баз бехIбихьниличил мубаракбирулра ва лебтанилра ил цалра убкалунси минутличи пашманхIедиэсли, гIибадатлизиб беркIили дигулра.
