Арц багьандан инсап-хIяя дирцули сари
Наб чевкъули саби нушала республикала гьундурачивад имцIали вашес, хаслира дила мякьларти районтала. Нушала халкь дебали саберхурти адамти саби. Илдас дигахъу хIянчи дарес, хаслира илди дарибтани чус сабухъ лебхули биалли.
ХIера, гьундурачибра дакIубиуб-ли саби арц сархес багьандан бузути бизнесменти. Гъай сари камерабачила ва машинабачи кадатурти хасти камерабачилара. ГIе, гIяхIси саби нушала машинабачиб башанти къалабахIебикIули, багьлали башалли. Адамтасра урехи хIебирар ва ара-сагъли хъули чарухъесра вирар. Камерабани илис халаси кумек бирули саби. Амма! ХIердизирая нушала гьундурачи? Се агиличир сари илди? Душманна авиацияли бомбаби лайдакIили тIутIударибтигъунти сари. Хаслира Сергокъалала гьундури дебали вайси агиличир сари. Нуни аргъес вирули ахIенра — илав илдачи хIерикIуси ва халкьла гьалаб жаваб бедлугуси агарсив? Гьундури сегъуна агиличир сарил хIербикIути агара, амма гьар 200-300 метрличи камераби тIашдалтули сари. Илди диршухIели, илдала бегIтани улкализир дузути законти далули сарира ибси суал алкIули саби. ХIера, хъярхъдешличи хIерудибирути камераби шими-шагьуртала духIнар ца километрла цаличирад ца тяйдили диэс хIяжатли сари. Шимала дурар биали илди 5 километрла тяйдили диэс хIяжатли сари. Нушала гьундурачи хIердизирая? Леб ца мягIничебси масъала: илди имцIали тIашдатес вирули сай урехи лебси, яра хIянчи дурадуркIути мераначир. Юх, асубирар нушала гьундурала аги хIисаблизи касили, илди имцIали тIашдалтни.
Ягъари, базриганти, бизнесменти, вачар-чакарлизир дузути адамти, хIукуматла вакилти, гьундурачи хIердикIути жавабла хIянчизарти, дараягу гьаланачи гIяхIти гьундури ва кIинайс вецIал метр ургарли тIашдалтеная илди! АсухIебираргу инсап-хIяя арцлис дирцес.
ЦагьатIи секIал — вегIлис дигуси скоростьличи кадалтути ахIен илди камераби. БекIлибиубси гьунчир, цацадехIти мераначир 70-ли километрличи дяхIчиаибти анцIбукьуни дирули сари. ЦацадехIти анцIбукьуназиб камера чум километрличи кабатурсил балахъути ишараби чедаэсра агара. Камера тIашбатни балахъуси ишара, шими-шагьуртала дураб 150-300 метрличиб биэс хIяжатли саби, шила бухIнаб 100 метрличи. Дузутив нушачир илди законти, яра законти чIянкIли гIядатла адамтас сарив хасдарибти? Чили жаваб лугусив?
