«ЛЯМЦI САР АДАМЛА ГIЯМРУ ТАРИХЛИЗИР ЗУБРАЛА»

Хизри Юсуповлис – 70 дус

УркIи – кьалам кабурхар,

Харждирар хIи рурхъути,

Ца тугъ алкIан – хамдирар

Поэтла рухI дурхъати!

УРКIИРА НУРА

КьиркьирхIейубра урхIлис

ДуртIес диги уркIила,

ЦабехIта дила гьавлис

Кьимат лугалра «кIила».

«Гьаваличив вашуси»

Сайри жагьхIели илдас.

Чи калзана къакъгьавли

Жагь гIямрула дуклумас?!

КъянахIейубра гъайлис

Бедибси гьачамалра,

ЦабехIта ил хIекьдешлис

БекIлил кьимат хIегалра.

Къяна викIира къянас

ХIерхIейкIули чичилра,

Вархьагарси сайри эс

Набзи чили вирара?!

Ну арцанван вирира,

ХIебла шала дихуси,

ЦабехIтас хIейгахъира

Забван миъби дикуси.

Загьруван калзира ну

Нажасла нясти рухIлис,

Набчил Жагьаннаб бириб

Къалпси чIинкIир хIякимлис.

Амма гьаннара хIяя

АхIен дила гъапулли,

ЦабехIли гьавлис гьая

БихIулину хIядурли.

Илди цабехIти бургар,

ЧевхIелкIахъес «бузути»,

ЦархIилти биаллира,

Наб гьуни гIеббурути.

ХАТIАБАЛА ХАЗНАЧИ

ХIяздухъун дусми урла

Къелкадарес тяп хатIван,

ХатIа агарли деркIес

Вируливан сагадан.

Ну хатIванра цалра хIярп

Чилилра хIебалуси,

Дон-Кихотван сайра ну

Лебтанилра валтIуси.

Ну цуннира акIубла,

ГIямрулис убайсиван,

Агаркъи дунъяличи

Цалра вирхуси нуван.

Ну тIалванра эски юрт

ТIашаэс убяхъибси,

ВячIишара марли, мурт

Дунъяли бекIлизибси?!

Умцес хIейрар чилилра

ЧIумадеш дила яхIла,

Хазначи ветаурла

ХатIабас дила…урхIла.

КЬЯРКЬСИ АМРУ

Гьар алкIуси бархIили

Барсбируси дунъяван,

Гьачам ласдухъун хIили

Варсирули сай инсан.

ДибгIянти дарсдешуни

Дурчули сар дусмани,

Илкьяйда диши уми

Дарскадирар кьамани.

ГIямрула гIеркъал архIя

АбзхIели замунтачил,

Ца инса гIямру – хIярхIя –

Мешудиркур гьигьличи…

ЛямцI сар адамла гIямру

Тарихлизир зубрала –

Иличиб кьяркьси амру

Лебсив гьатIи дунъяла.

НУР ХIЕЛКАН

УрхIлисван набра гIяхI дев

Дигахъисра набчила,

Сецад гIяхIхIедилзалра,

Ляв-кIучI тухъси гапчила.

Бархьдешра наб гIяхIбилзан

Кьяркьси биалра сецад,

Сунени хIебихалра

ГIяхIдеш мучила кьякьцад.

УркIи гьаргли, хIер бархьли

Халкь-ургав хIерирулра,

Адамла уркIибарес

Лебси гьав харжбирулра.

Нур хIелкан вебкIибхIели

ХIябличирадли дила,

Илди дуртIулра нуни

ГIяхIгъубзнас ишбархIила.

КЬУТАДЕШЛА ИЗАЛА

Ца гьигьла манзиллизиб

Инса пикрила айгъир,

Дунъя гIелаб батурли

ГIяршла байлизи биур.

Илгъуна цIакьси ахъри

Лебкъира дагьрилизиб,

«ХIергъулра» урхIла пикри

Нушани лякьирлизиб.

Ца хIерлицун мусисирт

Чедибяхъес дирулра,

Амма мякьлавси пякьир

Рахлира чехIейулра.

Илгъуна — кьутадешла —

Леб нушазиб изала,

Ил жявли чейхъуси саб

ИмцIабиалли давла.

ХIЕБАРИРАГУ ПЕШКЕШ

Абзур бархIи хIед нуни

ХIебарирагу пешкеш,

ДукелцIила нурана

ХIехира хIечи кепдеш.

ХIебиалли тяклари

Дила лугIянти гап-чяхI –

Иличибра халаси

Вирирав хIед барес гIяхI?!

Абзур дуги цайналра

ХIегира зубартачил,

ГIяршла лехIдешла лайла

Минабарили хIечил.

ХIебиалли дугIлари

Дила духъянти хъями —

Илдани хIебаршибгу

УркIбала ургаб гуми.

Абзур бархIи ва дуги

Гьачам хIясаддеш кира —

Илдани тамай дишун

Нушала хIяланира.

ДУДЕШЛА ГIИЛМУ

Гьанна дудешла гIилму

Биули саби набчи,

Вахъ кьабулли ахIенси

АкIубла жалукьличи.

Гьанна тяниширулра

ПасихIдешла нурличил,

Баришли хIерикIулра

Кьисматла хIязаначи.

Гьанна бурсиирулра

ГIямру мяштIдирес, узес,

Тилади агарлира

Гьариллис гIяхIдеш бирес.

Гьанна хIисабдирулра

ГIямрула куцра, ласра.

Гьанна ахIердирулра

Нуни яхIра, ламусра.

Гьанна бурсиирулра

Дунъя дигахъес, улгес,

КъиянхIедикаллира

ЗубрачивяхI хIерикIес.

ХIЕРХУС ХЪЯМАЧИ

Дегъси авлахъла дублаб,

ДяргIиб шинна шякьиван,

Хапли къарширикили,

Ну уцира ясирван!

Дигалра хъями сари,

Гьигьаначил дурути,

ХIулбани иргъахъалра

ХIейъни илди дурусти.

Багьес къиянни ахIен

ЧумдехI «дигайли» хIерзи,

Дарибтил гьанналаур

Ил хIела уркIилизи.

Сецад къайгъибарадра

ХIулбала хIер амъахъес,

Чебиулра илдала

Ранг хIедирни чардухъес.

УрхIла хъябра дурцули,

Делкунти хIела някъби,

КьабулхIедиру, багьи,

Чархла гьарил биркIанни.

Даршна тикрардарибти,

ТIимкьван гьаладилзути,

ХIерхус хIела хъямачи,

Хаиндешла тIем бархти.

ГIУРРА ХIУ ЦУГРИКИРИ

ГIурра гIяхIладли сайра

Ну шилизи вакIибси,

Дигайла къел-хIерзилра

Дургис или, —умцIуси…

ГIурра хIу цугрикири

КахIебурхул хIерличил,

Ну инжитхIейрахъуси,

Даимси суалличил…

—Мурт поэт ветарулри?

Ил саби хIела суал, —

Нуша-ургар диубти

ГьанхIейкахъес гьабурцул…

Амма суалти гьанна

АхIен гъайли дурути,

ХIела хIулби хьардикIар:

— Варгилирив талихIли?

Ил суал саби набчи

Занзи кьяйда алтIуси,

Цаибти дигайла нур

Набзир пархдулхъахъуси!