ЛехIдеш чебихьунти шими…
ХIера, шакра хIейкили каберхур дурхъаси Рабазан баз. Абзур баз дагъистанланти ва арагIеб дунъяла бусурманти дуббурцули калун, балга-дугIя дариб, садакьлуми дуртIи, жамигIятличил дарх дехIибала ва дахъал цархIилти гIяхIти баркьудлуми дурадеркIиб. ЧевяхIси Аллагьли ﷻ кьабулдараб илди ва азир балагьлис гьаладизаб.
Амма иш макьалала гъай иличила ахIен. Рабазан баз таманбиубхIели, дехIдихьиб дурхъати бурхIни. ХIера, Хала бурхIнала (ГIид аль-фитIр) байрумтачи шагьуртазибад лебилра халкь чус дурхъати ва ахIерти мер-мусаличи чарбухъун.
Шимазир цIябдешли, лехIдешли ва бугIярдешли дуцибти хъулри сагадан мицIирдиуб. Ахиратла хъули арбякьунти хала бегIтала рухI шаддиуб, чула гъамти чебаибхIели.
Илкьяйдали шила гIяхIлани чула алхунтала хIябрази кьулгьуличил зиярат дураберкIиб. Алхунти гьанбушиб, илдас дурхъати балга-дугIяра делчIун, садакьара бутIиб.
ГIур биалли абзур баз шилизибти гьести гIямрула адамтачил шадибгьуни дураберкIиб. Илди шадбариб. Илдас сагати гIямру дедибтиван бизур.
Амма байрумти кадерхурхIели шагьарланти чула мер-мусаличи чарбухъун. ГIурра хъулри дацIкадухъун. Хъулрачил дархли дучIути кьакьурбира лехIкахъиб…
ХIурматла узби ва рузби, Хала бурхIнала байрумтачи шилизи архIя дураберкIни гIяхIси саби. Амма илала дурабадра шимази шадив вашни гьатIира гIяхIси саби.
Илизибад сегъуна гIяхIдеш лебси? ХIушани хIушала дурхIни, дурхIнала дурхIни хIушачил барх хIуша акIубси мер-мусаличи букес дирудая. Илдани хIушала шиличила, тухумтачила багьудлуми мурхьдиру. Илкьяйдали шила шанти шагьарлизиб къаршибикибхIели, кумек гIеббиахъесра бурсибиру.
ВегIла биштIаси ВатIайзи шадибгьуни дураберкIес дуравхънилизиб сегъуналра цIахдеш агарагу. ГьатIира хIушала хIурмат-хатир ахъдирар. Шила адамтани хIуша далара, хIушани илди.
Ил багьандан дила узби-рузби, хъуммартида хIуша акIубти, халадаибти, дурхъати мер-муса. Хъуммартида хIушала унра-хунра, узи-урши, тухум-агьлу. Ва илдачила хIушала дурхIнази имцIали буреная. Дерхъаб хIушала гIямру!
