Адамдешлизиб ахъти
Дунъяличиб вайтачибра гIяхIти адамти дебали имцIали саби. Сен илдигъунти пикруми дакIиба?
СенахIенну алавчарли кадиркути, гьарилла уркIиличи кьакьадешла ва децIла хIялани дихути анцIбукьуначи хIерхIеили, къияйзи бикибтас кумекла някъ гьабатес къалабати адамти чебиухIели. Тяп илкьяйда биъни марбиуб Дагъистан къияндешуначи ва гьанагарти балагьуначи бяхIягибхIели.
Дубурлантала дурхъати гIядатуначиб бяркъурти, вегI акIубти мер-мусала ва бегIтала хIурматбарес балути адамти, саби чинаб биалра, гъамтас, шантас, балу-бирхутас кумекбарес къайгъилизиб бирар. Илдазибад цацабехIтала илцад-декIар халати имканти хIедиалра, гIяхIси девличил адам гIевуцес, анцIкьилизи викибсила дард чебарбукести дугьби даргес имканбикIули саби. Иличиб се гIяхIси леба? Кьакьадешлизибси уркIи батбухъахъи, адам разиварили, пишвяхъяхъялли, Кьудратла ВегIлира илис кири биахъуси саби. Илдигъунти биалли, нуша-ургаб бахъал лебниличи бирхауди бирхьулра.
ГIяхIти адамтачиб саби дунъя тIашсира: илдала пасихIти дугьбани ва кагибти баркьудлумани нуша гьаладяхI дикулра, гьатIиралра халати сархибдешуначи гьуцIдирулра. Илдигъунтачибад гIибрат касес къайгъилизиб бирар жагьилтира гIулухъабира. Гьавкьянабили бетаурти илдани саби челябкьлара шаласили бетарахъуси.
ГIяхIти пикрумала бегIти адамтани чула пергер кьасанала авидлизи шакалра хIебикахъили цархIилтира битIикIу. Ил хIяракатлизир бутIакьяндеш дирутала лугIира бархIиличи-бархIи имцIабикIар. Иличибли саби адамти-ургабси цадешра дебабикIуси: гIяхIдешуни дирнила гьуцIли лебилра уржахъибхIели.
ГьатIиралра имцIабикIаб дунъяличиб гIяхIти адамти ва илдала пикруми-кьасани гIердурцути!
