УркIи изутира леб
КIел жумягIцадхIи, улкала цацадехIти регионтазирван, нушала республикализирра цIабикьалала (топливо) багьнала шайчир гIяхIцад дарсдешуни кадикиб. Илди хаслира къячдикун шагьуртазиб хIербирути адамтачи.
Буралли, цIабикьалала багьни дусла бехIбихьудличирадал гIяхIцадла ахъдиублири. Амма улкализиб ил хIебиънила масъулти акIубли ахIен. УргIебли, илдигъунти пикруми алкIахъули сари нушала улкала къаршикартани, къянала багьахъниби тIинтIдирули.
Гьарли-марли, Крымлизир ва сагати регионтазир бензин хIебиънила масъала аргъбаибсили бетарули саби, сенахIенну илар набт хIядурбирути заводуни агара, цIабикьала биалли, ила цархIилти регионтазибад бихес хIяжатбиркули саби. Иличил барх, Украинала миллатчибани нушала улкала набт балкьарахъути заводуначи ва Крымла гьундурачи зумали чябхъинти дирни багьандан, байхъу островличи ва сагати мер-мусаличи цIабикьала биахънила шайчир къияндешуни алкIахъули сари. ЦархIилти регионтазиб биалли, цIабикьала хIебиънила масъала адхIекIахъес хIукуматли къайгъибирули саби, хIяжатли биалли, цализибад итиллизи ил биахъули. Ил багьандан сари заманалис зиддешунира детарахъути: цацадехIти заправкабачиб адамтас имцIали тIашкабилзес хIейгниличибли.
Амма илдигъунти аги-кьяйдализиб чус хайри касес дигутира камбирули ахIен. Бензинна багьни дурхъадиъниличил дархдалсахъули сари цархIилти масанала багьнира. Гьайгьайрагу, леб ил шайчиб аги-кьяйда пикрилизи кайсути ва адамтачи уркIи изути. Илдигъунти вачрукьябала тукентазир масанала багьни баз гьалар сари лертиван кали сари, ахъхIедуцили.
