Се баралли гIяхIси?
Се баралли гIяхIси?
Мекъ барес гьалар ва кIинайс гелешмешли цIикурлис савгъатдарибти ваяхIлис се бируси? Илди чардарни тIалаббарес ихтияр лебсив? Илди чардарес чебсив?
ЦIикурилис сукни духибти ваяхI жагьилти-ургар магьар дихьили хIедиалли ва мекъ бетерхурли хIебиалли, гьалмагълизиб чардарахъес ихтияр лебси саби. Илини илди садакьалис, савгъатлис яра цархIил нигетличил цIикурлис датес чеасили хIейалли.
Эгер магьарра дихьили, мекъ бетерхурли биалли, гьалмагълизиб ихтияр агара мекъ барайчи цIикурлис дедибти ваяхI черсасес, сегъуна нигетличил дедили диалра декIардеш агара.
ДекIарбикили гIергъи ваяхI чардирнила тяхIяр сегъуна нигетличил дедибал илизибад дигахъуси саби.
БекIахъудила шайчир хьунул гIерруцес муруйчи хъарти гьар секIал: палтар-кьяш, берк-бержла продуктуни, хъа ваяхI, кьям-кIуцIул, умудеш бирнила ваяхI ва цархIилтира хьунуйс кавлути сари. Хъали хьунуйс хIебатес ихтияр лебси саби, эгер илис савгъатбарес кьас хIебиалли, ва илис савгъатлис батес ибти мягIнала дугьби дурили хIейалли. Гьарил секIал муруй сегъуна нигет барибсил илизибад саби дигахъуси.
Имам ШафигIла мазгьабла машгьурси гIялим ибну ХIаджар аль-Гьайтамини сунела «ТухIфатуль мухIтаж» жузлизиб лукIули сай: «Магьар дихьес гьалар гьалмагъли сунес ураркьибси цIикурлис дедибти гьар секIал илди садакьа, савгъат кьяйдали дедибти хIедиалли, яра садакьалис ва савгъатлис или нигет хIебиалли, гьалмагъли илди ардухес вируси сай. СенкIун илди ваяхI рурсиличи хъайчикеръниличил бархбасунси вягIдала мас сабхIели, магьар диалли, хIедихьиб (мекъ бетхIеур)». Тяп ил тяхIяр саби цIикурли гьалмагълис дедибти ваяхIлисра.
ГIурра илини лукIули сай: «Муруй хьунуйс хъали пайдаларикIахъес бедес гIягIниси саби. Берк-берж, хъа ваяхI, палтар-кьяш, кьям-кIуцIул, умудеш бирути ваяхI ва цархIилтира биалли, хьуна ихтиярлизир диэс гIягIнити сари.
«Аль-Кьафи» жузлизиб бурили саби: «Лерил хьунул адамла матяхI муруй сунела хьунул сунес жагасили риахъес багьандан асибти диалли, савгъатлис ахIи, хьуна арилизирти ахIен».
Ил суайзиб ца пикриличи хIебакIалли, хьунул сунес савгъатдарибти сари рикIули, мурул заманалис дедибти викIалли, вархьсилизи мурул халируси сай.
