Редакциялизи суал

Редакциялизи суал

- Сегъунти дехIибала дархдирхъес асубируси ва илди секьяйда дархдирхъути?

- ДехIибала дархдирхъес вирар архIяличивси замана. Дархдяхъес асубируси саби хIерейсла дехIибала хIери гIергъи дирутачил ва бархIехъла дугила дехIибайчил. Мисал, хIери гIергъи дирути дехIибала хIерейс дирутачил дарх дирути сари яра иличи ургIебли, хIерейс дирути дехIибала хIери гIергъи дирутачил дархдирхъути сари. Илдигъунти шуртIри сари бархIехъла ва дугила дехIибала дархдирхънила шайчирра.

ДехIибала дархдирхъути архIябала шуртIри ишдигъунти сари дирути:

1. АрхIяла ца шайчибяхI гьарахъдеш 83 километрличиб камси биэс асубируси ахIен;
2. АрхIя асубируси журала биэс гIягIниси саби, цархIилван буралли, ил архIяла мурад шаригIятли асудирахъутазибадси биэс чебиркур (хIялалси);
3. Белгиси мурадличил гьаланачибал вягIдалабиубси мерличи дурабуркIуси архIя биалли.

Адамлис хIери гIергъи дирути дехIибала хIерейс дарес ва дугила дехIибала бархIехъла дехIибайчил дарх дарес дигули виалли, илхIели чедир гьандушибтачил дарх гIурра хIябал шартI тамандарес чебиркур:

1. Гьала-гьала цаибти дехIибала дирути сари, хIери гIергъи дирути хIерейс дарес кьасбарибхIели, хIерила дехIибала гьалар дирути сари. Илкьяйда бархIехъла ва дугила дехIибалара;
2. Нигет цаибти дехIибала дарили тамандиайчи бируси саби, гьатIира гIяхIси саби кIиэсти дехIибала дарес нигетра цаибти дехIибала дарес бируси нигетличил бархбяхъялли. Мисал, нуни нигет барира паризалла хIерейсла 4 ракагIятла дехIибала хIери гIергъила дехIибайчил дархдяхъили дарес, Аллагь ﷻ багьандан, Аллагьу акбар;
3. Дархдирхъути кIидехIефлра дехIибала дарх дирути сари, суннатла дехIибала ургар хIедарили яра ихтилатлизи гъудурхIейубли. Амма асубируси саби къамат баресра (дехIибала дарахъес жи).
4. ВегI хIерируси мерличивад дураухъи виъни.

Эгер адамлис дехIибала гIелайзи ардухес дигули виалли, хIерейсла хIери гIергъи дирутачил яра бархIехъла дугели дирутачил дархдяхъес дигули виалли, илхIели ишгъуна шартI таманбарес чебиркур:

1) ДехIибала гIелайзи ардухес нигет хIерейсла яра бархIехъла дехIибала дируси замана таманбиайчи бируси саби.

2) Адамли дехIибала гIелайзи архули виалли, кIиэсти дехIибала дируси манзил сабайчи, ва дехIиба замана таманбиайчи мусафирли калес гIягIниси саби.

Амма кIидехI дехIиба-ургаб гьабгIергъидеш бузахъни, халаси манзиб ургаб хIебатни ва цаэсти дехIибайзиб дархдяхънила нигет бирни суннатси саби.