Вайтира лер, гIяхIтира...

- АхIерси редакция, адамти лебси ва цархIилтира мераначир дирути жиндрачила ва шайтIунтачила бурили дигахъира, илдала уми лертив?

- БегI гьалаб бурес чебиркур илдачила гIягIниагаршал гьанбуршес хIейгесилизи халбируси саби. Илдала уми дурес, илдала санигIятуначила ва журабачила гъайикIес - дебали хIейгеси анцIбукь саби. Илдала у бурнилира адамлис зарал барес бируси саби. Ил багьандан нушани къантIти баянтицун гьаладирхьулра адамтази илдачила ва илдазибад бируси заралличила багьахъес багьандан. ХIушази ва хIушала гъамтази мяхIкамдеш барахъес ва сахъли диахъесра. ГIяхIси саби илдачила ва илдала баркьудлумачила гъайхIейкIес фитнабази хIейкес багьандан.

Жиндри – ЧевяхIсини цIали-зирад акIахъубти сари. Илди хIедирхути диалли шайтIунти сари, дирхути диалли жиндри-бусурманти сари. Жиндри адамти кьяйдали ванзаличир хIердирути сари, имцIаливан дубуртачир, шиннизир, ва пукьназир. Жиндрани чула куц барсбарес дирути сари, цархIил жураличи шурдухъес, луцразирад дет-саддашес ва чехIедиутили дирес. Дирхути жиндри-ургарра гIяхIтира вайтира лерти сари.

Жиндранира адамтани кьяйдали наслу гIелаб батурли, дубкIути сари. ШайтIунти диалли (иблисуни) алкIути сари, амма Кьиямала бархIи сабаайчи дубкIути ахIен. ГIур илди лерилра дубкIути сари. БархIехъла дехIиба замана сабаибхIейчирад илди кьакьурбазирад къяйцIдикIути сари, ил багьандан ил манзил биштIати хъулиб бирни гIяхIси саби.

ШайтIунтани адам чеввалкIахъес халаси къайгъи бируси саби, ва Аллагьлис ﷻ гIибадат бирнилизивад адам гIелумизахъес. Илдани зарал бируси саби адамти излумачи, къияндешуначи, мискиндешличи, балагьуначи ва цархIилтира вайдешуначи лебкули. Адам жиндралавиэс вирнира гIячихъси саби, ил багьандан илдани адамлис ва илала арадешлис зарал хIебарахъес багьандан гьаман бучIес чебиркур: «АгIузу би-Ллагьи мина шшайтIани рражим» - «Нуни Аллагьлизи ﷻ берцуди тиладибирулра лягIнатбушибси шайтIайзибад».

Цаибил жиндла у Сумия сабри. Аллагьли ﷻ ил акIахъубхIели, илизи хIед дигуси тиладибара или буриб. Илини 3 секIал тиладидариб: 1 – ибил, сунени ва сунечибад акIубтани гьар се-секIал чедиэсли, амма саби чехIебиэсли; 2 – ибил, хIябцси ванзализир дицIесли; 3 – ибил, гьести гIямруличи ваибси сагадан жагьсили ветаэсли. Илкьяйдали бетаур. Кьуръайзиб абзурли сура лебси саби «Жиндри» бикIуси, илкьяйдали «ШайтIа вягIза» бикIуси аятра лебси саби.

ШайтIан адамла душман биъни ЧевяхIсини бурибси саби, амма гьарли-марли Аллагьличи ﷻ вирхуси адам илини чеввалкIахъес хIейрар. Ил адамла кьаркьайзи каберхурли хIи кьяйдали вяшбикIес бируси саби. Амма адамлис илдани зарал барес хIедирар Аллагьли ﷻ имкан бедалли ахIенси, ил багьандан нушаб мяхIкамдеш барес чебиркур ЧевяхIси Аллагьла ﷻ кумекличил, илизи тиладидикIули.

Жиндрала жураби:

Аль-Амиру - жиндри сари адамтачил илдала хъулразир дирути, амма иладани рахли ахIи зарал бируси ахIен. Ваннализир ва хIяжатханализир дирути биалли шайтIунти сари, ил багьандан нушази хъарбарибси саби АгIузу би-Ллагь... бучIахъес.

Аль-Карину - жинд саби адамличил акIубси ва иличил вебкIайчи кавлуси. Илини вайти пикруми алкIахъу, вайти баркьудлуми дирахъу, васвасикIахъу, бунагьуначи вику. Илала хIянчи вайсиличи гьирвирес ва гIяхIсиличивад гьарахъварес саби.

Аль-Мариду - халати кьаркьлумачилти жиндри сари.

Аль-Ифрит - бегIлара цIакьси саби, илис кьаркьа халадеш гIягIниси ахIен жинд Марид бебкIахъесра бархли илала гьунар биуси саби.

Умему Сибъян - илини хьунул адамла дурхIя ахIелкIахъу. Илини 7 дус хIебиубти дурхIни бубкIахъу, хъалибарглизир къалмакъар алкIахъу, мура-хьуна ургаб фитна кабуршу. Илкьяйдали илини биштIатала нясси мухIли лимцIбиру илди рабчбикIахъу, цIакьагарбирахъу ва зягIипбиркахъу.

Аль-Гъавлу - гIяраб мезличибад шурбаталли «дугели дакIубулхъуси» ибси саби. Ил сапарлизиб цунни дураухъунсиличил бархбиркур. Ил илкьяйдали цунти, хъалибарг ва дурхIни агарти адамтала мякьлаб багьарбирар. Илала хIянчи саби адамтази урехи абацIахъес, гьунчибтас къияндешуни акIахъес, чеббулкIахъес. Иличибли адам вайти анцIбукьунази, макрулизи ва сихIрулизи виркур.

Жиндри дахъал сари ва гьарилтачила бурес хIейрар, ишичирли диахъехIе.

ШайтIунтала жураби:

Ханзаб - дехIибайчивси адамлис диргаласи, васвасикIахъуси, уркIилизи бирхаудиагри хьурабируси.

Гаффаф - адамлис зарал бируси, урухвируси, вайти жанивартала сипатличил башуси.

Залнабур - базуртачиб бируси ва адамти биргIябиргахъес бузуси саби. Илала бузери саби гIямултардеш ва макрукьядеш, вачрукьязи секIал исуси виргIявиргахъес кумекбируси.

Валлгаа- дазала дирухIели диргалабулхъуси.

Сабар - балагь бакIибтала гьими-кьяс цIакьбируси саби, дяхI къябдирахъули, чIярбикIахъули.

Агвар - адам зиналичи левкуси шайтIан саби, адамтала къехIбадеш алкIахъули.

Даасим - хъалибарглизир дягIбирти, фитнаби адилкьан саби.

Матриш - къалпти баянти, гъай-мез тIинтIдирес бузан.

Даггар - дугели адамличи кахдеш башахъуси, бусухIели адамти урухбируси.

Тамрих - адамти чула баркьудлумачибад гьарахъбиркахъуси.

Миклас - адамла хIязаначи иштяхI ва гъира алкIахъуси.

Илкьяйдали дахъал гIуррара гьандушес вирар, амма нушани балу-балули лерилра хIедурулра, сенкIун ил хIейгеси саби. Илдани бируси заралличила ва вайдешличила багьес багьандан ишар гьандушибтира диур.

Илдазирад дерцес багьандан даим Аятуль Курси бучIесра хъуммартидая, иличила биалли нушани гIергъиси номерлизиб бурехIе.