Се бируси?

Нушала бучIантани дахъал суалти хьардиули дирар Алжаналичил дархдасунти. Гьаман хьарбиуси суал саби – Алжанала агьлу чула мерличи баибхIели, илдани илар фарзла дехIибала дирутив?

- Динна гIялимтала ил шайчибси цаси пикри хIясибли, Алжана чучи хъарти секIал дируси – дуббурцуси ва дехIибала дируси мер ахIен. Иличи ургIебли Алжана – адамтани дарибти гIяхIти баркьудлумас сархибти шабагъатуни кайсули, иштяхIличил ва лазатличил хIервируси мер саби.

Бирхаудичебси хIядислизиб, сабира имам Муслимли баахъибси бурили саби: «Нуни бакьира, марлира Алжанала агьлу бужули ва букули хIербирути саби, илдазибад вайси гягI башуси ахIен, илди хIяжатханализи башути ахIен, я тубикIути я гIяншбикIути ахIен». ИлхIели асхIябтани Идбаглизи ﷺ хьарбаиб: «ГIур беркеси чина арбашуси?» Илини жаваб бедиб: «Беркеси кьаркьайзибад дура башуси саби гIепбушили ва майъаличил, майъа мискIла тIемдикIути сари. Илдани Аллагьлис ﷻ деза бирули, чевяхIвируси сай, тяп хIуша гьигьдикIуси тяхIярли».

Дарес черти фарзани Алжанализир хIедирар, эгер илкьяйдали чис-биалра дехIибала дарес дигиаалли илди дарес асухIебирниличила нушачи бирхаудичебси селра хIебаиб. Ил шайчиб нушани балуси агара, Аллагьли ﷻ гIяхIил бала. Алжанализиб адамли гьарил сунес дигуси секIал кайсуси сай, сенкIун ил адабчебтани шабагъатуни сархуси хъали саби.

 Иш дунъяличирти гIямрулизиб нушала чебла саби ЧевяхIси Аллагьла ﷻ разидеш сархес къайгъибарни. Илкьяйдали умутличил диъни нушала гIяхIти баркьудлуми сабабли Сунени нуша Алжанализи хьурадирниличи.

ЧевяхIси Аллагьли ﷻ лебил бусурманти даимлис Алжанализи хьурабараб! Амин!