Гурдарив яра арслан-къапланрив?

Цагьачам сапарличи дуравхъунси жагьил адам цIябдаибхIейс чIянкI авлахъличив калун. ДугIла мицIираглизивад урухиубли, илини кьасбариб дуги беркIесил мер баргес.

Баргили галга, иличи ацIиб. БахъхIи агарли, галгалиу дяхъи-хъаслабиубси гурда гIяргбикIули бакIиб. Адам ил чебаили пикриухъун: «Сели бугесара, секьяйда милиги ахъесара гурдани?» Камси замана дикили гIергъи, арслан-къаплан хъусбяхъили барткелра галгала мякьла сабаиб. КъяббикIули, кесекунадбарили бергун ва белкъи гьарахъбикиб.

Гурда хъусбикIули гъамбиуб, лига-кьякьяличиб калунси диъ берги, илра белкъун. Жагьил адам пикриухъун: «ХIера! Аллагьли (с.т.) бяхъибси гурда гушли хIебатурли, илала кьяшмала уди сегъуналра къиян агарли, бергеси баахъиб». Илини гьаман вягIза-насихIятуназиб иргъусири, гьариллис сунела пай биуси саби ибси. Гьанна биалли, ил сунела хIулбани чебаиб. «ГIур сен ну инжитвирусира хIянчиличи вашули? Нунира сегъуна-биалра хIериэс мер баргили, илав хIерли вирус, Аллагьли (с.т.) набра беркесил баахъайчи», – илала бекIлизи пикри минабиуб.

ШаладикибхIейс, ил увяхIяхъили галгаличивад ватихьиб сунес мер баргес. Баргили гьунчибси буркьбиубси хъали, илав хIерли кайиб чизи-биалра сунес се-биалра хахъес. Арбякьун ца бархIи, кIел, хIябал, сегъуналра беркеси агара. Гушиубли, бекI жургъбикIесбииб. Инжитвиубли, гьанкI чебакIиб. Илини муэрлизиб тIамала иргъули сай: «Эй, абдал адам! Сен иша кайхьунсири? Айзи! Сен хIу уркIецIидухъахъес хIерсири, хIукIун ара-сагълири?! ХIед хIу дяхъи-хъаслабиубси, гIяргбикIуси гурда сай или гьанбикили хIебиэс? Айзину узен, арслан-къаплан кьяйда вии, цархIилтасра хIезибад гIяхIдеш биэсли. Гурдала биалли, гьунарагарси цархIилли диру».

Ил гьанкIлизивад чеваргъили тамашавиуб: «ВяхI! Муэру гъари иш набчил кабикибси, яра хIуруцIу?!» ИлхIейчивад сунела хатIа аргъили, ил гьатIира чеветаили узес вехIихьиб. Илини аргъиб, вегIли къайгъибирусилис биъни Кьудратла ВегIли кумекбируси.

ХIЯДУРБАРИБСИ Н. ГЪУРУЕВА