Пайдалати

3. Апельсин – пергер цIедеш саби, сунезибра халаси кьадарлизиб С, В кьукьяла витаминти, калий, магний, цинк, железо, фосфор ва кальций лерти ва иммунитет гIеббурцуси. Илизир кьаркьайзирти агъулати секIал дурайути антиоксидантуни лерти сари. Илини уркIила-тумала даража чIумабиру, флавоноидунала кумекличил хIи шинкIадиру, хIила гъяж ва холестерин гIяшбиру. Илкьяйдали илизиб хIулбас пайдаласи А витамин леб. Апельсинни камличи, никубачи ва гъезличи гIяхIси асарбиру.
4. Мандарин – илизибра леб С витамин ва агъулати секIал дурайути секIал. Илкьяйдали В кьукьяла витаминти, чулира нервабала ибкьдеш убисути ва илди гьунчидуршути. А, Е витаминти ва магний, кальций, фосфор, натрий, железо минералти. Мандариннизибси калий ва фолиевая кислота биштIатас баибти хьунул адамтас дебали пайдаласи саби. Илини хIила гъяж гьунчибуршу ва клетчаткала кумекличил чимхъа-умхитIла бузери къулайбиру. УркIилис ва тумас пайдаласи саби, инфаркт ва инсульт хIедиахъес мяхIкамдеш биру.
5. ГIинц – илизибси С витаминни чейхъути излумачи къаршидеш диру, иммунитет ахъбиру. Клетчаткали чимхъа-умхитI гIяхIил дузахъу, зараллати секIал дурайу. Холестерин ва хIила гъяж гIяшбиру. Илкьяйдали илизибси катехинни ва хлоридзинни ракла изайчи къаршидеш диру, ликопинни илгъуна асарбирнила дурабадра уркIила тумала бузери гIеббурцу. Илини хIилизибси чакар гIягIниси кьадарличиб кавлахъу. Ил В, Е, К, А витаминтачилра давлачебси саби, иличибли кьаркьайзир кадиркути дарсдешуни гьунчидиркахъу. ГIинцбазиб илкьяйдали кверцетин ва рутин лебси саби бекIла мехIелис пайдаласи ва фосфор, железо, калий, кальций, магний, йод, цинк минералти. Халаси пайда касес вирар вегIла мер-мусаличир дакIибти гIинцбазибад.