Тулкни

Бисмиллагьи РяхIманир РяхIим

АлхIямдулиЛлагь шукру, багьахъурил дин «Ислам»

Деза Аллагьлис биаб дин «Ислам» багьахъурси,

Сай хIекьли марварили, иманра бухахъибси,

Кьалубалализирад бусурманти дарибси.

АлхIямдулиЛлагь шукру багьахъурси дин «Ислам».

Адамла къакълизирад акIахъуб зарратуни,

Гьар капур, бусурманна мицIирдариб рухIани,

ГIякьлу бедиб гьариллис, дагьахъур анцIбукьуни,

АлхIямдулиЛлагь шукру багьахъурси дин «Ислам».

«Аласту бираббикум» буриб чузи Аллагьли,

«Бала» - нушала Аллагь, сайри иб муъминтани,

«НагIам» - ахIенри или, жаваб гиб капуртани,

АлхIямдулиЛлагь шукру багьахъурси дин «Ислам».

Адам, ХIява бетаур гIялам халкьла неш-дудеш,

МяхIяммадла умматла диъни леб халал гIяхIдеш,

Ибрагьимла миллатла диъни леб динна бархьдеш,

АлхIямдулиЛлагь шукру багьахъурси дин «Ислам».

ХIянапи, ХIянбалира, Маликра, ШапигIира,

Мазгьабти авал сари, ну ШапигI мазгьаблара,

Ил сай Идрисла урши, МяхIяммад саби ура,

АлхIямдулиЛлагь шукру багьахъурси дин «Ислам».

Иман, Ислам ва Суннат, динна аслу хIябал лер,

Иман – урегал секIал, Исламла шел рукну лер,

Расулла гьуни буцни нушаб Суннатли бетаур,

АлхIямдулиЛлагь шукру багьахъурcи дин «Ислам».

Аллагьли зарратличил кIел бутIа бариб гIялам,

Иман бухибтас бариб Гьалжана Дару-ссалам,

ХIебухибти капуртас хIядурбариб жагьаннаб,

АлхIямдулиЛлагь шукру багьахъурси дин «Ислам».

ХIябибла уммат дарни, АлхIямдулиЛлагь шукру,

Дин Исламличир акIни дурхъаси нигIмат саби,

Тавба кьабулбируси Аллагьлис хIямд ва зикру,

АлхIямдулиЛлагь шукру багьахъурси дин «Ислам».

ИхIсанна мягIна багьи, даим гIибадат бара,

Аллагь чевиусиван, Аллагьлис тIагIят бара,

ХIуни чехIейадлира Аллагьли чевиулри,

АлхIямдулиЛлагь шукру багьахъурси дин «Ислам».

Ца Аллагь вагьес черти лер вецIну хIябра сипат,

Далилтачил вагьурли, багьи динна хIякьикьат,

ХIекьли Аллагь марвара, багьурли вяхIданият,

АлхIямдулиЛлагь шукру багьахъурси дин «Ислам».

ХIяпизхIяжила пикри - хъарихъ гIяламлис, халкьлис,

Зикру, тасбихI, дин бузар - дучIули Кьуръан-Калам,

МяхIяммадличи буша гьар даим салат салам,

АлхIямдулиЛлагь шукру багьахъурил дин «Ислам».

Пикриухъен мискин

Пикриухъен мискин дунъяла хIяйчи,

Чум алхуна гIяшикьли сунечи,

ХIясратли жайчи, бучиб масличи,

ЦIяб хIяри арбякьун, дунъя батурли.

ХIура аркьяд чархIелхъул сапарличи,

Савгъат хIядурбара пашманхIейэсли,

ХIед пайда хIебиру масли, дурхIнани,

Пайдаласи гIямал, хIебурциду хIуни?

Ажай хIу уцили бурушла калхьад,

ГIязиз жан дерцахъес дарман хIебалад,

СягIидрив, сакъиррив, чирил, хIебалад,

ВиргIяиргилри нафсли, гьавли, шайтIай.

Диннизив пасадли, гъапулли кавлад,

ГъапуруряхIим сай, ца Аллагь викIуд,

ГIямал агархIели, Гьалжайчи хьуликIуд,

Умут дугIла биъни, хIуни хIебалад.

Дунъя гьанни лерилгIямру деркIадли,

Абадла хъайс гIямал баргес хIейадли,

РяхIман Аллагь гьимукIили варгадли,

ХIяйран вариши хIу цIакь гIязабтани.

Даршал азирлим гъану авра азир,

Идбагуни кахIелун дунъяличиб,

ХIетур цIакьси пачяхI, дурхъаси вазир,

БетхIеур цалалра уркIила мурад.

ХIебатур дурхъаси Расул, асхIябти,

Чинаба залумти, цIакьти талхъунти,

Пикривара Намруд, ГIяд, ПиргIяванти,

ХIебатурли буциб цIудар гIянжили.

Азир дус калунси НухI идбаг хIетур,

Иш дунъяла пачяхI Зулкьарнай хIетур,

Дунъя мулк барибси Сулайбан хIетур,

ГIуж, Дажал батуру, ламарт дунъяли.

Ламартла дунъяра, гIур хараб бирар,

ВерхIдехI мусни-зубри гIур панадирар,

Жан айсул ГIизраил вахъ гьалакирар.

Аллагь сай кавлуси, ил багьи хIуни.

Дунъяли гIялам халкь гьалакбариб хIябра,

ХIетур идбаг, асхIяб, вали цалра,

Панабариб гIябид, гIялим, загьидра,

Шакмеркуд, ярга биур хIечира.

Камси дунъяличиб, лаззат айсанти,

Ранг-рангла палтурти, чуни челгьути,

Дунъяла мас-мулк дила бикIанти,

Буциб бебкIала цIакь мусибатли.

Куц жагали или къугъабиранти,

Мас халаси или, пахрубиранти,

Насаб, наслу халал, саби бикIанти,

ЦадехI гIянжили, лебилра буциб.

Милкъяли дужули цIудара хIулби,

Кадиркули исбагьи чархла диъби,

ТIутIули биркIанти, дерхIиб лигуби,

Илдас биубил вершадеш балад хIуни.

Аллагь, ХIяпизхIяжичи ряхIмубара,

Сунела гьар бунагь-хатIа кIапIдара,

Гьар гIязаблизивад, ил хассарвара,

КIелра хъайзи вархьвара Аллагь, ХIуни.