ДугIя – бусурмантала ярагъ

ШаладикибхIели бучIуси

Идбагли ﷺ буриб: «Эгер савли ва бархIехъ хIяйна-хIяйна сураби «Аль-Ихлас», «Аль-Фалякь», «Ан-Нас» дучIалли, гьар журала вайдешуназивад верцес вирар.

«Аллагьумма бика асбахIна ва бика амсайна ва бика нахIья ва бика намуту ва иляйка ннушур».

МягIна: «Я Аллагь ﷻ, ХIела гIяхIдешличирли нуша шаладикайчи мицIирли калунра ва ХIела гIяхIдешличирли бархIи ахъайчи мицIирли калунра. ХIела гIяхIдешличирли нуша хIердирулра, ХIуни дубкIахъутира ва ХIечи сарра чардулхъутира».

БархIи ахъибхIели бучIуси

«Аллагьумма бика амсайна ва бика нахIя ва бика намуту ва иляйка ннушур».

МягIна: «Я Аллагь ﷻ, ХIела гIяхIдешличирли нуша бархIи ахъайчи хIердиубра ва ХIела гIяхIдешличирли нуша хIердирулра, ХIуни сарра нуша дубкIахъути ва ХIечи сарра нуша чардулхъутира».

Чеблумази викибхIели бучIуси

«Аллагьумма инни агIузу бика миналь гьамми валь хIузни, ва агIузу бика миналь гIажзи валь касли, ва агIузу бика миналь джубни валь бухли, ва агIузу бика мин гъалабати ддайни ва кьагьри ррижаль».

МягIна: «Я Аллагь ﷻ, гьарли-марли, ну шишимъултазивад ва децIлизивад верцахъес ХIези тиладибирулра, дила гьунарагардешлизивад ва чеветхIеибдешлизивад верцахъес, кьиркьирдешлизивад, урухкIудешлизивад, яхIагар-дешлизивадра верцахъес ХIечи дугьаилзулра. Я Аллагь ﷻ хIезибад берцуди тиладибирулра халати (къиянти) чеблумази викнилизивад ва урхIла зулмулузибад».

ВиштIаси акIубхIси дудешлис бучIуси

«Барака – Ллагьу ляка филь-мавгьуби ляка, ва шакарталь Вагьиба, ва балягъа ашуддагьу ва балягъа биррагь».

МягIна: «ЧевяхIсини хIечи ва хIела виштIасиличи баракат бархьаб, ил хIед гибси Аллагьлис ﷻ хIуни дезни дирид. ХIела виштIаси халавааб ара-сагъсили ва цIакьсили, илала адабдешлизибад хIедра гIяхIдеш биаб».

Илис чарбируси жаваб

«Барака – Ллагьу ляка ва барака-Ллагьу гIаляйка» яра «Ажзаля – Ллагьу савабак».

МягIна: «Аллагьли ﷻ хIедра баракат бараб!» яра «ЧевяхIсили хIедра шабагъат имцIабараб!».

ДяхIимцIайзи хIерикIухIели бучIуси

«Аль – хIамду лиЛлягь. Аллагьумма кама хIасанта халкьи фа – хIассин хулюкьи.»

МягIна: «Шукру Аллагьличи ﷻ! Я Аллагь ﷻ, дила хIял-тIабигIятра, хасиятунира жагадара, ХIуни дила куц-кабиз жагабарили кьяйда».

ГIяхIдеш барибсилис бучIуси

«Джазака – Ллагьу хайран»

МягIна: «Аллагьли ﷻ хIедра гIяхIдеш бараб».

Савгъат бедибхIели бучIуси

«Барака – Ллагьу фикум»

МягIна: «Аллагьли ﷻ хIушаб баракат бараб».

«Ва фикум барака – Ллагьу»

МягIна: «Аллагьли ﷻ баракат хIушабра бархьаб».

АрхIяличивад чарухъунхIели

ГIяхIсилизи халбируси саби адам сапарличивад чарухъунхIели, кIел ракагIятла дехIибала дарни. Сунела мер-мусаличи саибхIели, Идбагли ﷺ ишкьяйда бурусири:

«Айибуна таибуна гIабидуна лираббина хIамидуна».

МягIна: «Нуша чардулхъулра, тавба дирулра, ЧевяхIсилис икрам бирулра, ва Иличи шукру бирулра!»

Илкьяйдали хъули айцIухIели, сура «аль-Ихлас» бучIни гIяхIси саби.

АрхIяличивад чарухъунсилис бучIуси

Сапарличивад чарухъунсиличи дугьаизурли, ишкьяйда бурни гIяхIси саби:

«Аль – хIамду лиЛлагьи ллязи саллямака».

МягIна: «Шукру Аллагьличи ﷻ, хIу мяхIкамварибси».