Нушала бучIантала назмурти

Мавлид

Аллагьла ﷻ саламтачил

Дунъяличи вакIибси,

ХIури дурхъаси Расул ﷺ,

Аллагьличи ﷻ ваибси.

Ла илагьа иллаЛлагь,

Шукру АльхIямдулиЛлагь.

Аллагьличи ﷻ ваили

Разили чарухъунси,

Дурхъал Аллагьла ﷻ калам

Халкьличи даахъибси.

Ла илагьа иллаЛлагь,

МухIяммад РасулаЛлагь.

Аллагьла ﷻ дурхъал хъули

Лебтас гьуни абхьибси,

ВикибхIи ахир жайзи

Дурхъати гъай дурибси.

Нушаб Аллагьли ﷻ гибси

Идбаг ﷺ сайри дурхъаси,

Адамри вахъ кагибси

Куц кабизла жагаси.

Аллагьла ﷻ кьадарлизивад

Увухъес виъхIейубси,

Аллагьла ﷻ табтуртазир

Дурхъати гъай дагьурси.

МухIяммад Идбагла ﷺ у

Чули дурхъабарибти,

Аллагьличи ﷻ кайзурти

Нушара бусурманти.

Дурхъал МухIяммадличи ﷺ

Саби нушала гьуни

Дукьес нуша иличи

Гьарбизахъаби ХIуни.

Аллагьли ﷻ лебтазивад

ЧеввикIибси МухIяммад ﷺ,

Лебил дигутазивад

Дурхъавариб МухIяммад ﷺ.

Халкьла уркIбас хIу дарман,

Сайри дурхъал МухIяммад ﷺ,

ХIечи бирхарантачи

Бирири хIуни иман.

Дунъяличиб акIубти

Халкь дурхъали чебиуси,

Аллагьлизи ﷻ булгути

БихIес къайгъилизивси.

Дунъяличи вакIили

Адамтачил кайибси,

Шантачил варх виубли

Чула хIурмат барибси.

Разиси хабарличил

Аллагьличи ﷻ ваибси,

ХIу Идбагла ﷺ уличил

Сунечивад вакIибси.

Адамтачи Аллагьли ﷻ

Вархьибси дурхъал РяхIман,

Нушачил сай ил вархли

Аллагьла ﷻ табтуртазив.

Халкьла уркIбасил дарман

Сайри Аллагьла Расул ﷺ

Аллагь ﷻ сай лебтас иман

Сунени вариб кьабул.

Аллагьла Расуйс ﷺ хIурмат

Биру дунъяла халкьли,

Кабатур ахъси кьимат

ГIяламла адамтани.

Дурхъал Аллагьла ﷻ гъайлис

Марли калун МухIяммад ﷺ

Ил сайгу нушаб бахълис

Гьарли – марси мугIжизат.

Иш дунъяла гIялам халкь

Бархьси гьунчи кабатурси,

Чули бариб къиян хIекь

Саби-ургаб буртIуси.

БегI гIергъи абалтул гьигь

Арякьун нушачивад

Нушаб бурул гIергъи гьигь,

Багьахъес вакIиб Идбаг ﷺ.

ДехIибала дирута

Ил уркIиличив виху,

Балга-дугIя дирута

Сай мурталра гьануршу.

Дунъяличив ил нушаб

Левси ца виъни балас,

ХIеварили сай пашман

Жагаварес ну калзас.

Ла илагьа иллаЛлагь,

МухIяммад РасулаЛлагь.

Ла илагьа иллаЛлагь,

Шукру АльхIямдулиЛлагь.

Амирарслан РяхIманов,

Избербаш

ДулгехIе

Аллагьлизи ﷻ дулгехIе

Дургъби тIашаа или,

Нушала нешанала

Нургъби чехIедаэсли.

ГIурра бирехIе балга

Узби, уршби берцахъес,

Ишди вайти пачнала

УркIби кIантIидиахъес.

БирехIе гIурра балга

Адни мяхIкамбарахъес,

Мякьлаб биалли илди

Бирар уршбас гьамадли.

УркIецIила ВегI Аллагь ﷻ!

УркIецIи бара ХIуни,

Ишди жагал уршбала

Жагьилти гIямруличи.

Кьудратла ВегI Аллагь ﷻ!

Кьабулдарагу балгни,

УркIи-уркIиларадли

Нешанани дирути.

Нешлис баркалла

Баркалла ая абас

ХIушаб гIямру гибнилис,

Батурли муриси гьанкI

ХIушаб лайла бучIнилис.

Баркалла ая абас

ХIушаб гIямру гибнилис,

Цаибил газ кацIахъес

Халал къайгъи барнилис.

Баркалла ая абас

ХIушаб гIямру гибнилис,

ГIямрула дукьбачирад

Някъ буцили дикнилис.

Баркалла ая абас

ХIушаб гIямру гибнилис,

Ламус, хIяя, адамдеш

Се сарил дагьахънилис.

Патимат ГIялибекова, Сергокъалала район, Миглакьаси

ХIябал баз

МухIяммадла ﷺ умматла

Бусурман динна узби,

Мубарак дирулрая

Ишди дурхъал бузрачил.

Чучира нуша хIерти

Илцад сари дурхъати,

ВецIну кIира баз ургар

Дурхъати хIябалра баз.

КIел дунъяла хужаим

ЧевяхI Аллагьли ﷻ нушаб,

Дулгахъес дакIахъибти

Дурхъати хIябалра баз.

Дулгахъес ва дучIахъес

Гьар башуси бархIилис,

АльхIямдулиЛлагь или

Шукру сунес бирахъес.

Шукру дикIахъес нуша

Бац-БерхIи адулхънилис,

Зубрира ва муснира

Нушаб мутIигIдирнилис.

Шукру сунес дикIули,

Шуйна сужда бирахъес,

Гьаладуцили някъби

Аятуни дучIахъес.

Дурхъати дуги-хIери

ДелчIунти балга-дугIя

Аллагь ﷻ дила, Дурхъаси,

Чевверхи, кьабулдара!

Нушала бучIантала назмурти