Нушала бучIантала назмурти
Хала нешла хабар
Хъумуртули ахIенра
Хала нешла хабурти,
Ну мицIирли лералли,
УркIилизир кавлути.
Буркьунзала мягIнара
Гьанна бахъли хIебала,
Телефон - компьютерти
Лебтани гIяхIил дала.
Буркьунза бирусири
БархIехъличил лебтани,
ХIяйван-къача ибгили,
Унрачи бурци гьуни.
ХIянчира бузахъули,
Дурутири хабурти
ГIямрула гьундурачир
Чедаибти, дакьибти.
Хъа регIли лухьутири
Картошка, къабакъ, хъара,
Илди агарли гIергъи,
Се буркьунза бирара?
Гьанбушиб хала нешли
Ца анцIбукь тамашала,
Бетаурси сунечил
Къадализиб БирхIела.
«Демжурти дургъби сарри,
ХIердиэс къияннири,
Тупанг буцес бирути
Лебилра дявтазибри.
ИтхIели кабикибси
Ца анцIбукь леб уркIилаб,
Мурталра улукьули,
Башуси хIулби гьала.
Хъулир декь адерхурли,
СяхI анкIила бухили,
Аррякьунра шинкьани
БирхIела къадализи.
Набчи ярга баили,
Дила цIули делкьунра,
Иларти декьла хили
Ну тамай релкъахъунра.
Савли дугила манзил
ЧаррулхъухIели хъули,
Буциб БирхIела гьуни
КIел ахъти къаралдили.
ШаккIун ну шакрикира,
ВатIа вершаби сабни,
Гьаббухъи дявлизибад,
ВацIализиб мер баргни.
УркIрухъи тIашризурра,
Антэс рирхIерирулра,
Набзибад се гIягIнисил,
Нуни балхIебалулра.
Цали хъямбариб тавра
Делкьунти декьличилси,
Итилил викIар набзи:
«Биаб гьуни гьамадси».
Сен-сен раирал хъули,
Гьанбиркули ахIен наб,
Бусулири биштIати
Гьарил чула бурушлаб.
Кариили рамсайчи,
Рисира. ГIур гьанбикиб,
Чис кумекбариб вара
Нургъба иш дунъяличиб.
БиштIати абизурхIейс,
КьацI барес гIягIнилири,
Аммаки декь чинарад,
Кайсусил хIебалулри.
Хапли гьанбикиб буслус
Хала нешли наб гибси,
ГIямал буунхIели саб
Илгъуна шишбируси.
Буслус бедили, декьла
СяхI хира унрачибад,
КьацI буцIарси берцIира
Мухъарла декьлизибад.
ИтхIейчирад ардякьун
Чум- чумилра вецIал дус,
Наб гIямру дерцахъибси
ХъумхIертис дурхъал буслус.
Рулгусра Аллагьлизи ﷻ
Мадиаб или дявти,
Чумра адамла хъули
Хьурадариб шишимти».
Хала нешли хумарли
Ахъдуциб хIулби, хIеръиб,
Дила сурс-кьакьарлизи
Халаси гIянд кабииб.
Цаибил учительница
АвцIали имцIякь дусми
Дикили шалгIердухъун,
ХIела дурсри сеналра
Дусмани хъумхIертахъур.
ХIуни кадихьиб дурсри
УркIиличир дихулра,
ХIела гIякьлула дугьби
Хъумартес хIерирулра.
ХIуни наб гибти дурсри
Заяли архIедякьун,
ВецIну шурала бацван
Наб шалали адухъун.
Ардякьун хъярхъли гIямру,
ДуцI урчила мурдаван,
ГIерраира хIед нура,
Урчилис гIярчумагван.
Вайти, гIяхIти къиянти
Дуцири имтихIянти,
ХIела гIямрула гьунчир
ХIечи къаршидикибти.
