Аминат ХIяпизовас – 65 дус
Аминат ХIяпизовас – 65 дус
БархIиличи бархIи, дусличи дус сунела пагьму бугабикIахъули, поэзиялизиб сари регIси дякь баргили, Аминат шигIрула магьирси уста ретаурли сари. Илала назмурти нушала гIямруличила, адамтала ургар диги камдикIниличила, ВатIан дигахъниличила, дубурла урунжла шинван умути хIяланачила сари. Илала творчество дигантас сагати назмурти гьаладирхьулра.
Паргъатси дуги саб, гьанкIли дертурли
Дубурти дурхIниван дусули сари.
Абалкунси бацла шалал пишбяхъни
Сирила чедирси нешла дяхI сари.
Иш жагадешлизиб, дигайли ахIен
Дила гьанкI бумцIахъул – дард цархIил саби:
Ахъдешлизир дахъхIи даргъли дургъули
Дубурла кIел чIака дяхъили сари…
НигIматуни нушаб тIабигIят – нешли
Нешла ниъван матъал хIялалдатурти,
Цала цали сари халкьли лутIули
Аждугьни аурли хIиличи гъаргъли.
ХIила саруркIули, хIял кабурхули
Ахъдешлизир чIакни улхули сари,
Бусрав маслигIятла бирул агарли
Жагьси тIабигIятла тIама саб буи…
Адамти, атхIебла ванзала вавни,
Ца зимла манзилла дунъяла гIяхIли,
ИкI къугъал бацла дяхI хIердикIахъули,
Кабуршулрав дунъя се хIебиули?!
Урунж
ТIякьаили шури шарабла чури
Раб-рабли аберхур че дунъяличи.
Кьабулбариб шадли ванзала дяхIли
Ца гьатIи шаласи, амъурси хIули.
ХIербикIар иличи бархIи ахъайчи
Милиги хIейхъуси дуцIрумла бархIи,
БархIехъ – зубартала дурзамра сабра
КуртIбухъес кабицIур цIикури бацра!
СупIдикIар илизи унхъри, майдунти
ЗярхIбикIар вавнала тIемлизиб гьава.
МурхьбикIахъу урунж башули жагьти
Сунечи дирути марпдешла хъяма.
ДуцI хIярхIбиру ишаб гьарил айгъирли,
Чумилра гьункьяли дазала диру…
Чумлира, чумлира гIибрат касили
Шарабливан дунъя дигайли ирку!
Вайгъабза кахIершу хIярхIяли ахIи
Вайгъабза кахIершу
ХIярхIяли ахIи,
Бугьтанни, шилтахъли
Я урхIла дардли…
Гьамадли юлдашра,
Дигайра дирцу
Илис игьес, бахъли
ХIяхIя мяштIбиру!
ГIяхIгъабза бугьтанна
ДяхIцIили каршу,
Юлдашлис чейгуси
ХIярхIяли вирхъу.
ДяхI-дяхIли мусибат
БяхIчибизалра,
Илини адамлис
Ламарт хIебиру.
Вапйгъабза ахирра
Варгудар, убкIар
Сай вегIти загьрули
Варг умхагвалли…
Сен цабехIтас дунъя
Ишцад гьарзасил,
Сен бебкIализибадли
УруххIекIутил
Аргъес бекIхIейубли
УбкIар вайгъабза.
ГIяхIгъабзали илис
ЦIелдара калтIа!...
Се пайда се адлира…
ГIяламли бузахъуси
ГIядат саби дурхъаси
«ГIяхI сягIят бираб» - бикIан
Сапарли аркьутази.
Ил дурххъаси аманат
Булъулра цацахIели
ГIяхI баресван гьалакли
Лебли вай бирутира…
ХIера бурям берхурли
Анхълизи вавни дибхес.
Сепайда се садлира
ХIейрадли анхъ батахъес?!
