«Дарга, барая балга»ы

ГIяллаева ПатIимат БяхIмудовна акIубси сари Дахадаевла районна КьярбачIимахьила шилизир 1981 ибил дуслизир. Илала белчIуди 1987 ибил дуслизиб бехIбихьибсири, Къаякентла районна Сагаси Вихърила школализиб. БелчIудилизир гьаларяхI аррякьунси илини кIел класс тамандариб ва КьярбачIимахьила школализиб белчIуди даимбариб. Иларра ПатIимат «5» кьиматуначил ручIули, школа таманбариб.

ГIядатла дубурлантала берхъибси ва балгунси хъалибарглизир акIубси ПатIиматли районнизир детурхути лерилрара-сера олимпиадабачир бутIакьяндеш дирутири ва гьаларти мерани дурцутири. Школализир ручIухIейчирад илис литература имцIали дигахъусири. ИлхIелири назмуртира цаладирхъес рехIрихьибси. Илала цаибти назмурти районна «Шила гIямру» газетализир дурадухъунтири.

Шила школа таманбарибси ПатIимат Дербент шагьарла медицинала колледжлизи карерхур. ХIунтIена дипломличил училище таманбарили, бузерила гьуни сари акIубси шилизиб бехIбихьиб. 2007-ибил дуслизир ил Кубачила больницализи рентген-лаборантла къуллукъличи шурратур. Сунела санигIятлис марси ва зягIиптачи уркIецIичерси, сунечи хъарси хIянчи чебетаахъили бируси ил кIинайс Бакьнила ФАП-ла заведующаяли шурралтули сари, иларад биалли СутбукIла ФАП-ла заведующаяли. БусягIятла замана ил КьярбачIимахьила ФАП-ла заведующаяли рузули сари. Илала санигIятлашалси бузери районна администрацияли ва бекI тухтурли чихъли кьиматлабирули саби.

Мурталра адамтачил рархрасунси ГIяллаева ПатIиматли даргала литературала давла чебицIахъесра замана бургули сари. Илала назмурти «Шила гIямру», «Замана» газетабазир, «Гьалмагъдеш» ва «Лачин» журналтазир дурадухъун. Адамтала арадешлис къарауйчирси П.ГIяллаевани даргала рухIлашалси хазна ишхIелла манзилличи далдикибти, бухIнабуцлашал мягIничерти назмуртани чебирцIахъули сари. Нушала газетала бучIантасра авторла назмурти гьаладирхьулра.

Нешлис

Неш – БерхIи наб савлила,

Ванадеш дарх дихуси,

Дарман малхIям някъбала

ХIяршбарили дируси.

Неш – кьиблама гIямрула,

ГIямрулис багаласи,

Устаз наб черикIласи

Агарси ташмишъала.

Неш – наб бару малхIямси,

ГIямрула бяхъяназир

Ну бурсириахъубси

Рургъахъес дузаблизир.

Дусми дуцIли сар гечли

Нуни чехIериула,

Някъбани кIапIруцили,

«Аба» рикIхIерикIула.

Кьакьати бурхIназирра

РакIили муэртазир,

ПасихI дугьби гIуррара

Дурхьулри уркIилизи.

ЧIямдарири, неш, чумра

БурхIни хIуни кьутIкьути,

ДейгIес хIейрар, марлира,

Дугурби гьанкIагарти.

ГIурра паргъатагарли,

ДурхIнала мякьлар сарри,

Аллагьлизи рулгули,

Даим кьукьубачирри.

Пикруми…

Урхьу-дубла багьлали

Дурарулхъас гIяхIладли,

ГIянручIла шихъла рангли

Зак чебаэс ухули.

Рамчлизи лайдакIили

Ардухахъес пикруми,

Хьамхьализи демхурли

ГIеладушес шишимти.

Багьлали ганзкарулхъас

Гъумли буциб бехIкадли,

Рамчанала тIамали

УркIи паргъатбирули…

Ахъмабурцида къаркъа,

Курличи чебушибси,

МухIли дукаркIаллира,

УркIи сабну кьакьали.

Ахъмабурцида къаркъа,

Дахъал сарну дигIянти,

Кьясдешла бурбунани

УркIи сабну бяхъили.

Ахъмабурцида къаркъа,

Шишимти шикьмайрида,

 Шахли дурцуну хIурхъи

Аргълизир дай дуцIрумла.

Далути-хIедалути

Жаваб агар суалти,

Чумлара дургар илди

Дарман агар излуми.

Ахъри Аллагьла халал

ЦIяб дуги бац башахъни.

Дуги каберхурхIели,

ГIянручI БерхIи абулхъни.

«Гьарахъдикахъая зянкъ»

Гьарахъдикахъая зянкъ,

Вайла хабар бихути,

ВерхIдарш хIурхъала гIелаб

Абни баргудахъути.

Гьарахъдикахъая зянкъ,

Мурадуни дулъуси,

Мар уркIила гелешмеш

Ванзачи цIапIалкуси.

Гьарахъдикахъая зянкъ,

Дудеш къардулхъахъуси,

Ванза булан лебилра

Убил-чедибируси.

Чарбухъахъен, чев Аллагь,

Кулпетуначи дурхIни,

Баришдеш имцIабара,

УркIбази иман беда.

Гьарахъдара, чев Аллагь,

ГIямру дулъути дургъби,

РяхIмула ВегI, уркIецIи

Бара хIела дурхIначи.

 Рирхулира, балулра…

БяргIиб къаркъала цIелда

Лига агар хIябрачир

Урдатурли дякьунти

АхIер жан харждарахъес.

Нушаб даршудеш гьанни,

ДурхIнас талихI булгули,

Сархирану чедибдеш,

Сен ганзкабирулира,

ГIуррара хIиллакарти

ЧIичIлумиван лукьули?

АхIерли абикьуртас

Сен гьалбилзулира?

Рирхулира, балулра

ХIушани убхIебалтни,

Гьарилла къакъла гIела

Малаикван тIашдилзни.

ХIушани дедибти жан

НехIекьла хIедиахъес

ДурхIнала дурхIначил дарх

ЧехIебиуси гIяскар

Алавчарли кабилзан.

 Аллагь, ну рамсурлира…

Я Аллагь, рамсурлира.

ХIедихули къакъли мах.

Я Аллагь, рамсурлира,

ХIейхъули кьяшли гьуни.

Чум-чуйнара тикрарли

Буради аба, хIуни

Ну хIехар хьаррикIули,

«Илкъи вамсес вирусив?»

Гьанна дила дурхIнира

Набзи саб хьарбикIули,

«ХIехъибси гьуни, аба,

Сен хIед бекIмахбулхъусив?

Агарли къакъличиб мах,

Сен декIли саб рикIулрив?»

Дусми, гIяжаиб дусми

ГIердаиб дила юргъас.

Абаниван нунира

Кайулра пашман макьам.