Газета бучIантала пикруми
Хайдакьла районна ветерантала Советла председатель Кахруманов Зиявудин Пашаевич сунела санигIят хIясибли, имцIаливан гьести гIямрула адамтачил къаршивиркули вирар. Ил илдачил гьаман гьунивиули, ихтилат дурабуркIу. Илини ветерантала зугIлуми ва челукьути масъулти арзес багьандан халаси къайгъи дакIубиру. Гьести гIямрула адамти гIеббуцес, илдас хIяжатси кумек гIеббаахъес сай вируси бирули, хIяракат дурабуркIу.
Ил нушала газетала вахъхIила юлдашра сай, дахъал дусмазиб ил кайсуси ва дигиличил бучIуси. Зиявудин Пашаевичли газеталичила дурути пикруми хIушабра гьаладирхьулра.
«Ас-салам» газета нушала гIямрула адамтас, хаслира жагьилтас дебали пайдаласи саби. Илизир адамтас багалати, илди адаб-хIяялашал бяркъличи биркахъути дахъал макьалаби дирар. Лер илизир адамти гIяхIти баркьудлумачи гьуцIбирути белкIанира. Илала дурабадра медициналичила ва арадеш ункъбирнила шайчирти насихIятунира дирар. Нуни дила гъамти ва балути адамтира жибирули вирус ил газета къулбасбирахъес, ил бучIахъес ва иларти насихIятуни пайдаладирахъес. Гьайгьайрагу, ишбархIила манзил адамтани жузи диаб, газетаби диаб камли дучIули сари. Амма нуни ил газета гьарилтази бучIахъес ва къулбасбирахъес маслигIятбирулра. Ил имкан пайдалабарили, бучIеная газета рухIлашалси багьуди касес багьандан, пашманхIедирудая. Ил къулбасбарес балкьхIеуртани биалли, газета асесра вируси сай.
