Мажлис бетерхур
Мажлис бетерхур
Сергокъалала районна КичихIямрила шилизиб хьунул адамтас хасбарибси мажлис бетерхур. Ил балбуцла сиптакартили биуб районна хьунул адамтала багьудила отделла руководитель БяхIяммаева Аминат ва хIянчизарти.
Балбуцличир бутIакьян-деш дариб МяхIячкъала ва Избербаш шагьуртала хьунул адамтала багьудила отделла хIянчизартанира. Мажлисличи бакIибти гIяхIлира цалабикибтала гьалаб гъайбухъун. Имам МяхIяммад ХIусейновли Кьуръа аятуначил мажлис абхьиб. Цалабикибтачи дугьаилзули ил викIи: «Дурхъаси хIядис лебси саби: «Ца гIяхIси мажлисли азир вайти мажлисла бунагьуни ицу». Аллагь ﷻ вайти мажлисуначивад чевурхар ца гIяхIси мажлисличи вакIибси адамла. ХIуша иша дакIибти рузби талихIчерти саррая. СенкIун ЧевяхIси хIушала бунагьуначивад чевурхар. КIиибилгъуна, нуша иша, Аллагь ﷻ чевяхIварили, Идбагли ﷺ хъарбарибси тяхIярли цаладикибтира. Ил саби нушала мурад – Аллагь ﷻ багьандан».
Балбуцличи гIяхIладли вакIибси Динислам КазимяхIям-мадовли, сунела яргализиб буриб: «ЧевяхIси Аллагьли ﷻ нешли барибси балга кьабулбируси саби. Ил багьандан дехIибала дархьмадалтадая, ва илис гIергъи, ахъдуцили някъбира хIушала дурхIнас балга биреная, я Аллагь ﷻ дила дурхIни бархьси гьунчибад башахъес кьадарбара или. Илди чебхIебалкIахъес багьандан. ДурхIни халабаахъили, хъайчикабатницун баибси ахIен. Илди лайикьти адамти бетаахъес, адабчебтили бяркъес гIягIниси саби».
Багьудила отделла хIянчизартанира вягIза-насихIятуни дариб. Школала директор Равганият МяхIяммадовнани чеалкIуси наслулис бедлугуси бяркъличила буриб.
Мажлисличиб гъайбухъунти лебтанилра, лерилра замунтазиб адамла гIямрулизиб бегIлара мягIничебсили кавлуси дурхIнала бяркъ биъниличила буриб. БегIтани илдас сегъуна бяркъ бедалра, илизибад саби илдала челябкьла дигахъусира.
Мажлисла дазурбазиб конкурсуни ва викторинаби дурадеркIиб. Илкьяйдали чIала бушили савгъатуни дедиб. Балбуц разити аги-хIяйзиб, жагати нашидуначил бетерхур.
