Нушала газета бучIантала пикруми

Сергокъалала районнизибадти «Ас-салам» газетала бахъхIила бучIантани газетала бухIнабуцличила чула пикруми дурули саби. Илди нушачи даахъес кумекбариб Динислам КазимяхIяммадовли, Рамазан ХIясановли ва МяхIяммад ХIусейновли.

Мухтар Багадзиев, ГIяяли-зимахьи:

- Шагьарлизив вирухIели, нуни мурталра «Ас-салам» газета исули вираси. Гьанна шилизи гечиублира ва чумал дус хIушала газета къулбасбарили кайсулра. Ил наб бучIес дигахъис илизир пайдалати насихIятуни лерни багьандан. ИмцIаливан наб дигахъис динничила белкIани ва суалтас жавабти, сарира гIядатла адамтасра аргъесли делкIунти.

Се-биалра балбхIебалуси биалли, газетализизибад гIячихъбарили багьес вирар. Илизир лер гьар журала, мягIничерти темаби. Газетализир халатас, жагьилтас, хьунул адамтас, дурхIнас хасдарибти белкIани даргес вирар. Дигутас илар лер тамашала анцIбукьунира. Нуни газетала кумекличил динна кьанунтачил дархдасунти, гьалар далхIедалути дахъал секIал дагьурра, челукьути масъултас жавабти даргира. Амма наб дигахъаси динничил дархдасунти белкIани гьатIира имцIали диаллири. Баркалла, иш нушачи биахъути лебтасалра.

БяхIяммад Кьурбанов Кичи-ХIямри, Сергокъалала район.:

- Нуни 90 – ибти дусмачибад бехIбихьили, «Ас-салам» газета къулбасбирусира ва бучIусира. Лерилра дехIибала-дазала ва цархIилти динна кьанунти лерти белкIани цаладирхъули вирус Кьуръан делчIес хIебалухIели. Наб хIяжатти динна секIал дургули вирус газетализир. Илар гьарил адамлис манпагIятти секIал даргес вирар.

Нуни 2011 ибил дуслизиб путевка хIясибли хIяж барибсири, 77 дусла гIямруличиб. Гьайгьайрагу, къияннири, амма кумекбирути лебри наб ХIурхъила, ГIяймаумахьила, БалтIамахьила, Мурегала шимазибадтани. Илдачил нушани гьаннара бархбас бузахъули дирехIе. Хьунуйчил барх нушани 5 пергер урши-рурси абикьурли, гIямрула гьунчи дураира, 62 эсил дус цахIнар уржили, цали цала иргъули хIердирулра. Ну гьести гIямрула виасра цалра жумягIла дехIибала убхIебалтас ва бусурмайчи хъарти лерил секIал дузахъис.

Нуни бурес дигулра цагьатIи секIал – гьар шилизир чула гIядатуни лерти сари, гьарилтани чучи хъарти дузахъули, гIяхIти баркьудлуми дурадуркIули Аллагьлизи ﷻ булгули халкь хIеркабиубли дигулра. Ца гьунчи халкь бакIили, урхIла секIал бигIхIебигIи, хъямхIебарили, беркхIеберки, цаличил ца балбикили, цала цали ибси бирули. Я хъулкидеш, я хъямчидеш хIедирули, чули барибсицун къиян чули букули, я зина хIебирули, тягIятличил, бархьси гьунчибад башули, ЧевяхIсиличи бирхули, цабалги хIеркабиубли дигулра. Хаслира нушала Дагъистан, улка ва лебил инсанти. МухIяммадла ﷺ умматли цала цали уркIи аргъили, ца гьунчи, ца динничи бакIили, дунъя разили калаб. Кьуръайчира, ахиратличира, Кьиямала бархIиличира бирхаурли. Барибси балга-дугIяра кьабулбарили, нушара ахиратлизир МяхIшарличир дяхI шалали ЧевяхIсини адизахъурли дигулра. Я Аллагьﷻ, нушала гIямалтачи хъархIехъили, ХIела уркIецIиличибли, нушала бунагь-хатIаличивадра чевверхурли, нуша Алжанализи дархьаба. Лерилра нуша, бусурманти, инсанти, ХIуни акIахъубти, ХIуни хIербарибти лебилра миллатунала инсанти, гьар секIал гьунчидушили, дерцахъаба. Я Кьудратла ВегI Аллагь ﷻ, ахир-иманна бархIи нуша адилзахъухIели, уркIецIи барили, Алжанализи хьурадарили дигахъира, иличи вирхра вирхулра!

МяхIяммадхIябиб Жамбулатов, Бурдеки:

- Иш газета дурайули бузути «Ас-салам» газетала редакцияла хIянчизартас халаси баркалла багьахъес дигулра. Ил наб дебали дигахъуси ва нуни мурталра бучIуси газета саби. Дила мурталра иштяхIдулхъан иларти жагали каргьахъурти, аргъести мезличи. Иларти белкIани аргъес дигусилис халаси мягIна бухIнабуцибсира саби ил. Наб хIяжатси секIал баргасли, уркIи дебали разибирули бирар. БиштIатасра дархли илар пайдалати насихIятуни даргес вирар. ГIуррара гIяхIбикIаб саби. ХIянчизартас арадаеш, талихI, гIяхIдеш далгес дигулра. Лебилра дарганти, бусурманти жибирулра «Ас-салам» бучIахъес ва къулбасбирахъес.

СягIид МяхIяммадов, Кичи-ХIямри

- «Ас-салам» газета нуни гьар дус къулбасбирусира. Гьанналис 20 дусличибра имцIали кайсулира нуни ил. ЦIакьли гIяхIси газета саби, жагати мезличил кагибти макьалаби делкIи сари ва бучIес иштяхIдухъесли бирар.

Нушала дин хала бегIтани бузахъули калунси тяхIярли, нушанира бузахъес чебси саби ва иличила белкIи саби газетализибра. ХIушазира тиладибирулра ил бархьси дин бузахъес. Ну 90 –ли дусличивра имцIали виублира ва ну ахIенти цархIилтира жибирулра иш газета къулбасбирахъес. Баркалла хIушаб, арали датабая лерилра иш бирули, лукIули дузутас ва нушачи биахъутас халаси баркалла. Аллагь разивиаб хIушачи!

Шамил МуртузгIялиев, Серго-къала:

- Бурасли, наб дебали гIяхIбилзуси газета саби. Чумал дус ил газета кайсулра. Ил наб дебали гIяхIбизур, сенахIенну чебетаахъили, каргьахъурли белкIунхIели. Илала кумекличил цацадехIти гIяраб мезла дугьбала мягIна иргъес бурсивиубра. ИмцIали гIяхIбилзан «суалти-жавабти» рубрика. Хъалибаргличил дарх хIердарести сари имцIати бяхIяни. Хьунул адамтас, дурхIнас хасдарибтира лер. Мисаллис, мурул адамти мижитлизи башухIели, балхIебалуси имамлизи хьарбаэс бирар, хьунул адамтани биалли, газетализибад касесра бирар. Дебали пайдаласи газета саби бархьси динничила. Ил нуни гьарил нушала Идбагла ﷺ гьуни буцибси бусурман адамлис маслигIятбаресра вирус. Дила хьунуйра бучIули сари. Хъули кабиибти адамтас динна дархьти кьанунти руркъяхъес имкан лугни, дебали гIяхIси ва дигеси анцIбукь саби. Илисра баркалла, ил къулбасбирути бахъбикIаб.

ГIябдулманап Идрисов, ГIяяли-зимахьи:

- «Ас-салам» газета гьаланачи нушала дудешли къулбасбирули калунсири. ГIур ил вебкIили гIергъи, нушанира кайсуkра. Ил нушала гIяхIси гIядатли бетаурли саби, газетара нушаб дигусили бетаур. БучIес хIяздухъеси саби, хаслира, суалтас жавабти наб дебали дигахъис. Гьарил номер чебетаахъили бучIули дирехIе. Нуни хIисаббирули, ил дусличи-дус ункъбикIули ва бучIес иштяхIдухъесили бетаурли саби. Илизиб динничилцун ахIенну, декIар-декIарти машгьурти ва бузерила адамтала кьисматуначилара багьес вирар. Лебилра ил газета дурайули бузутас ва нушачи биахъутас баркалла багьахъес, арадеш, гIеркъати гIямру ва цIакьси иман балгес дигулра.