ДурхIнас Идбагличила ﷺ хабурти
ДурхIнас Идбагличила ﷺ
Идбагла ﷺ дигIяндеш
Анас бикIуси уршили нушала Идбагла ﷺ хъарбаркьуни дирули, кумекбирусири. Цагьачам Анас дурхIначил кьакьализив хIязтали виркьулри. Илдачи Идбаг ﷺ гъамвиубли, салам бедиб ва Анас сунечи живарили, гIур чинарил вархьиб.
МухIяммад Идбагла ﷺ хъарбаркь таманбирули, ил кьанни хъули чарухъун. Анас хъули ацIибмад, нешли хьарбаиб:
- Сен кьаниубри урши?
- Ну Аллагьла Расулли ﷺ хъарбарибси бирули калунра. Анасла нешлис ил секIал багьес дигиаур: - Се хъарбариба хIечи Идбагли r? Анасли нешлизи малхIямли жаваб чарбариб:
- Ил дигIяндеш саби. Нуни чизилра иличила бурес хIейрус. Уршила жаваб нешлис гIяхIбизур. Илини ил гапвариб:
- Анас, или биалли чизилра мабурид ил дигIяндешличила, илкIун Идбагла ﷺ дигIяндеш саби. Иш хабарла мягIна Идбаглис ﷺ къуллукъбируси уршилис бегI гьалаб бяркъ бедлугни саби. Сунечи хъарбарибси бирни ва дигIяндеш бихIес бални. Ил урши халаваибхIелира сунечи игьдибар бихьесили ветаэсли. Идбагла ﷺ хьунрасра дигиаурсири илала дигIяндеш багьес, амма Анасли чизилра селра бурибси ахIенри.
МухIяммад Идбаг ﷺ биштIати дурхIначил къаршивиркухIели, илдас халатас кьяйдали саламра гили, ихтилатикIусири. Илдази сунела дигIяндешуни дурутири. Илдала бяркълизиб ил чараагарси къиликъ сабри, сенахIенну, иличибли дурхIни чучи умутбирхьни балули, гьарли-марти юлдашунили бетарутири. Илди биштIати халабикIуцад, илала кьадри багьурли, гьатIира халаси жавабкардеш лерти анцIбукьуназибра чучи бирхауди бихьес бирни чебиахъусири.
«ДуцIдухъеная набчи…»
Нушала Идбагли ﷺ сунела адавзи ГIяббасла, ЖягIфарла дурхIни ва илдала зиланти учибирхъутири. Илди сунечибад циила тяйдили кабизахъурли, някъбази сегъуна-биалра секIал буцили, живикIусири:
- ДуцIдухъеная набчи! ХIушазивад набчи чидил дуцIухъи бегI гьалав сааллира, иш секIал лугас! ДурхIни Идбагличи ﷺ дуцIбулхъутири ва иличи цIапалкутири. Аллагьла Расулли ﷺ илди ярга-яргали хъябруцбурцутири. Илди хIязти абзличи шурдулхъутири ва дурхIнас савгъатуни диркутири. Илдигъунти дурхIнас бяркъ бедлугути хIязани Идбагли ﷺ гьаман дурадуркIутири. Абзличив чедивикибсилис Идбагли ﷺ шабагъатра лугусири. Илала дурабадра илди лебилра дукла кIапIбуцили, лебтасалра Идбагли ﷺ сунела диги чедиахъутири. Илини чилилрайчиб гIяхIил балусири, дурхIнас чучи пикри бяхIчиаъни хIяжатси биъниличила.
МухIяммад Идбаглис ﷺ дурхIни уркIи-уркIилабад дигахъутири, илданира ил чебиусири. ХIязтачибли илдала бархбас гьатIира цIакьбикIусири. Идбагли ﷺ илди бегIлара ахIерти сабхIеливан, мурталра хъябруцбурцусири.
Гьарил дурхIялис гьанбиркусири ва дигили алавбурцусири Идбаглис ﷺ сай бегIлара дигахъуси ургус или. ЦархIилтани кьяйда Идбагли ﷺ «халатас диргала хIедикIули, ишарад дашеная» или ируси ахIенри. Илини илди халатала ургаб биахъубли, сунени гIибрат чебиахъули, бяркъличи биркахъутири. Илдани Идбаглизибад ﷺ гьачамалра хIейгеси гъай бакьибси ахIенри.
ПАТIИМАТ МЯХIЯММАДОВА
