Алжанализивси идбагла унра
Алжанализивси идбагла унра
Гьачам Муса Идбаг Аллагьличи балгаличил дугьаизур: «Я Аллагь ﷻ! ХIу набчил гъайикIухIели, наб Алжана чеасири. Наб багьес дигахъира чи вирарал Алжанализив дила унрали. ЧевяхIси Аллагьличибад ﷻ иличи жаваб бакIиб: «Шагьарла къатIлизив диъ бирцан хIерируси сай. Ил вирар хIела унрали».
Муса Идбаг ил секIайчи дебали тамашавиуб. Секьяйда гIядатла диъ бирцан идбагунала унрали ветаэс виубси ибси пикрили илис паргъатдеш лугули ахIенри, ва ил варгес арякьун. Ил баягъи диъ бирцанна тукен баргили, иличи хIеризес кьасбариб. Тукейзив пергерти куц-кабизличилси жагьил урши узулри. БархIиахъайчи ил хIянчилизи вархилри. Муса Идбагли ﷺ илала баркьудлумазиб селра-декIарси чехIебаиб. БархIехъ урши тукенра гIекIили, калунси диъла кесекра касили хъули арякьун. Муса Идбаг илис гIелавад ватихьиб. Илала хъа гьала бетаибхIели Муса Идбаг иличи гъамиубли викIар: «Аллагь ﷻ багьандан гIяхIял кьабулхIейриду?» Урши кьабуликиб.
Хъулиб илини диълизибад хурег бирес вехIихьиб. Ил сабаибхIели гIяхIяйзи сайцун укахъес буриб, эгер ил сунечил варх укес дигалли, циила сабурбарес чебиркур или буриб.
Мусани жаваб бедиб хъа вегIличил укес уус или. Уршили белхьунси диъла кесек бакIахъили ил бибгIянбариб ва хурегра касили пардавли кIапIбарибси хъа гIямзила гъамиуб. Пардав гьаргбарибхIели, Мусани илар рухъна чераиб. Уршили ил каратурли, гьарил диъла кесекра декIарли бедлугули, хурегли рахун. Гьар кесек кьяраибхIели, рухънани серил шивкIивбирулри. Ил рахи гIергъи, уршили ил рирциб, ил каратурси мер-мусара умударили, русахъес караркьиб. ГIур гIяхIяйчи чарухъун. Илди букес кабиибхIели, Мусани хьарбаиб:
- Ил хIела нешу?
- ГIе, дила неш сари.
- ХIуни гьар бархIи илкьяйдали илис къуллукъбирусив?
- ГIе, иличи хIеруди бирусилис дедес дила арц агара. Ил багьандан ил сабурличил ну хIянчилавад чарухъайчи хIерли рууси сари.
- Илини даим се шивкIивбирулрил хIуни иргъулрив, се рикIули ил?
- Ил рулгулри ва Кьудратла ВегIлизи дила урши даимси Алжанализиб Муса Идбагла унра виахъес кьадарбара рикIулри.
ИлхIели Муса викIар:
- ХIела нешлизи бура ЧевяхIсини илала балга кьабулбарили биъниличила!
