Кьядгаличила

Кьядга бисули вацIала дублабси майдачибад аркьулри. Илала диштIати качIуби бурбунази дархили ил дурабитIес къайгъилизирри. Илис изиарулри ва дебали децIигулри.

– Чинаба бархьдеш? Сен мисаллис, ярмала гули пухIялван кIантIиси?

ГIяралара тяп илгъуна саби. Хаслара балли гули дилайчиб кIантIили саби ва илизирад сегъуналра бурбуни дурадиркули ахIен… ДецIбикIниличибли ва гIясибикIниличибли илала бурбуни гьатIира дебали дурадикиб ва гьар шайчи детизур. Ил бисули ванзаличибад гербухъун, къаркъаличи булан суркдариб илди кьутIадиахъес багьандан, галгаличи атIахъун… Амма гьеч, гIяхдеш аги, бурбуни гьатIира къиздикIулри ва алтIулри, цалра бялчалра бялчули ахIенри. Кьядгала уркIи биалли малхIямси, кIантIиси ва жявли децIигуси сабри.

«ХIерая бурбунала гIянала гербикIули», – дукаркIулри иличиб бецI ва кеш. Вайерх дурхIнани биалли ил буцили, иличи кагъурти, гIинцбала ва мандаринна кесекунира цархIилти секIалра жибжирдатур, хIилхIи илдачибад бебшес бикиб.

«Се дигара бирис, амма бурбуназибад азадбулхъас», – пикрибикIулри кьядга. Илис кIел кацIала ихтилат аргъиб:

– Нуша гъез кьицIдиранничир калунра, ца сягIят калун ну лухIцIиличил инжитбирули, – бикIулри ца хя.

– Ил манзил дугIли арбякьи ахIен, дебали жагали саби, – гапбариб илала куц кIиибилли.

– ХIера ил саби наб гIягIниси – лухIцIи, пикрибухъун кьядга ва лухIцIи баргес гьайбиуб.

ПатIимат МяхIяммадова