Азгъинти дурхIначила

Муртрил сахаватси ва бузери дигуси хъубзара адам хIерирули уили сай. Илала азгъинти ва кьиркьирти дурхIни буили саби. ВебкIес гьалаб хъубзарли дурхIни сунечи жибарили сай ва пулан мерличибси хъуличиб кур буркъадалли, хазна бургидая или бурили сай.

Хъубзара вебкIибмад, илала дурхIни ургубализи дурабухъи саби ва дудеш викIуси хъуличиб хIебуркъибси мер батурли ахIен, амма дигIянбарибси хазна баргес биубли ахIен.

Илдас гьанбикили саби сахаватси дудешли хазнализирти мургьи дутIили сай или ва умцIлаби тIашаили сари. ГIур илдани пикрибариб: ванза баци-буркъили гIергъи, иличи ризкьи дегIес вираргу или. Узбани хъу анкIили бегIи саби. Чумал баз дикили гIергъи, давлачебси сабухъра бучили саби.

АнкIи дицили дикибти арцлис илдас арагIеб дус кеп-чеклизиб хIеркабиэс имканбакIили саби. Сабухъ бучили гIергъира узбас дудешли дигIянбарибси хазналичила гьанбикили саби ва хъу сагали буркъили саби, амма селра баргили ахIен.

Илкьяйдали узби ил тяхIярли бузес бурсибиубли саби, илис гьалаб биалли, селра бирути ахIенри. ИлхIели шакбикили саби илди дудешли чус бяркъ бедес багьандан илгъуна гIямал пикрибарили виъниличи. Илди хIялалти ва гIяхIси яшавличил хIербирути адамти бетаурли саби. Илди гIур ванзализи удатурти мургьиличилара пикрибухъи ахIен.

Адамла кьисматличила ва гIямрула мягIналичила гIилму руркънила баркьудира илгъуна тяхIярличи бяхIигули саби. Сабурагарти, гьар секIал къалабали сархес дигути бучIантачи вяхIягибси мугIяллимлисра къиянбулхъули бирар илди бархьси гьунчибад башахъес. ИлхIели илинира бучIанти цархIил тяхIярли бяркъличи биркахъули вирар, амма бучIантани мугIяллимлис сегъуна мурад сархес дигулил хIебалули биэсра асубирар, чула дагьрила сяйдешли.

Иш хабар Басра шагьарлизивадси машгьурси супи ХIясай бурибси саби или бурули бирар. Адамлизирра сунесра хабарагарли сегъунти-биалра белгити пагьмурти дигIяндиркули диэс дирар, ил сай цархIил мурад сархес хьуликIули виаллира. ЧIянкIли, гьаланачи камсилра къайгъи дакIубарес чебиркур.

БиштIати мяхIкамбарес бируси дугIя

ХIули игнилизибад ва цархIил журала вайдешлизибад дурхIни мяхIкамбарес багьандан бучIа:

«УгIизу – кума бикалиматиЛлагьи ттаммати мин кули шайтIанин, ва гьамматин, ва мин кули гIайнин ламматин».

МягIна: «Аллагьла ﷻ дугьбачи хъарихъулра, илдани хIуша мяхIкамдарахъес гьарил шайтIайзирад, мицIираглизирад ва хIулиигнилизирад».

Адамлизивад урух-виубхIели бучIуси дугIя

Сегъуна-биалра адамлизивад урухвиалли, иш 3 – йна белчIес гIяхIси саби:

«Аллагьумма, - кфинигьим бима шигIта».

МягIна: «Я Аллагь ﷻ, верцахъаба илизивад ХIед дигуси кьяйда!»