Хьул
Хьул
Ца ГIямар бикIуси адам мурталра узулри. Илала хIянчи дебали къиянсири – илини зе адилтIутири ва шагьарлизи ардухили дирцутири. Илкьяйдали ил хIеркайрулри. ГIямарла виштIахIейчибад хьул лебсири – арц дучили гIярабунала жинсла цIуба урчи асес. ГIур биалли, иличив сапарличи дуравхъес, Самаркандлизи ва цархIилти халати шагьуртазира ваэс.
Илкьяйдали узули илини даарила кьадар арц дучиб ва аркьуси карбайчил варх бегIлара гIяхIти валруми ва урчи дирцуси халаси базарличи арякьун. ГIямар базарличирти секIал чедаили хIяйраниуб. Илар лерри жагати урчи, жура-журала валруми, эмхIерухъуни ва цархIилтира мицIираг. Лебил базар чедибяхъили хьалли, илини сунес дигуси урчи хIебаргиб. Ца вачрукьяни илизи насихIят буриб: «Камси заманалис тIашизи. Асубирар вахъхIи агарли ухъна Абу вакIес. Илини дикути сари бегIлара черикIла урчи».
ГIямар пашманнири, илис цIяббиайчи хъули чарухъес хIяжатсири. ИлхIели илала хIулбау бикиб цIакьси жагьил валри. ГIямарлис сунела валри бухънабаъниличила гьанбикиб. Ил валри сунела хIянчилизиб дебали багалабиэслири. ВахъхIи пикрихIейкIули ГIямарли дахъалгъунти арцра харждарили, ил валри асиб. ХIера, ил базарличивад дуравхъи, шагьарла дура ветаибхIели, илис ухъна къаршиикиб сунес дигугъуна пергер цIуба урчира кили сайра базарличи лявкьуси. ГIямарла биса дакIудиуб, сенкIун тяп илгъуна урчиличи сайри хьуликIуси, амма илала ил асес арц аги…
