Ухънала насихIят

Ца адамли кьапIни дарили базарличир дирцулри. Замана аркьукад ил ухънаваиб ва кьяшми изесдяхIили вашес къиянбулхъаниуб. Илини сунела урши живариб ва иб:

- Гьанна хIечи хъарбиркур базуртачи вашули ишди кьапIни дирцес. ХIебалас, хIу баржардииркудал?

Уршили дудеш паргъатвариб сунечи бирхауди вихьес вирар или:

- ХIуни кьапIни хIядурдара, нуни биалли илди дирцис. 

Дудешли кьапIни далкьаахъур ва тавра бицIили урши базарличи вархьиб. Урши савли-жявли хъуливад дуравхъун ва гIяхIцад гьуни ахъили гIергъи вамсурли, галгалиу бамсриахъес кайиб. Ил илав ускаун. Галгаличирти маймунтани илала таврализирад кьапIни дикахъили уюнтани диркьесдииб. ВелхIунси уршили кьапIни хIедаргили пашманиуб, дудешла игьдибар марбарес хIейубхIели. Илини бареси хIебалулри, маймунти диалли кьапIначил хIязтазир галгаличир тяхIдикIулри ва илис дяхI дулкIахъули, иличир дукаркIулри.

Уршила талихIлисван мякьлавад аркьуси ухъна гъамиуб.  Пашманси урши ва галгаличир кьапIначилти маймунти чедаили илис гьар секIал якьиндиуб ва викIар:

- ДецIмайкIуд! ХIеризи гьари, таврализиб гIур кьапIа хебал. Уршили илаб ца кьапIа баргиб. Ухъна викIар:

- Чебиа бекIличи.

Уршили ил бекIличи чебииб. Маймунтанира чула бургачи чедирэс дехIдихьиб. Ухъна викIар:

- Гьанна убасили, шайчи лайбакIа. 

Уршили илкьяйда бариб. Маймунтанира тяп илкьяйдали тикрарбарили кьапIни ванзаличи лайдакIиб. Уршили илди дучили, таврализи кадихьиб ва ухънас баркаллара багьахъурли базарличи къалабаикиб.