ДурхIнас Идбагличила ﷺ хабурти

ДурхIначи диги

Ил асхIяб нушала Идбагличи ﷺ уршиличил варх вакIиб. Сунела урши илини гьаман кIапIурцулри ва байвирулри. Идбаглира ﷺ ил секIал хIисаббариб ва дебали гIяхIбизур. Илини асхIяблизи хьарбаиб: - ХIед урши дебали дигахъулрив? Уршила дудешли бекI гьакIбариб. ИлхIели Идбаг ﷺ викIар: - Марлира, сегъунти дигиличил ва малхIямдешличил хIу уршиличи хIерикIулрил чебиулра. Тяп илкьяйдали Аллагьла ﷻ хIечи гьатIира халаси диги ва малхIямдеш лебниличилара хъуммартид.

ЧевяхIси Аллагьли ﷻ нуша сецадла дигахъулрал аргъахъес багьандан, нуша – бегIтас малхIямдеш ва диги гибти сари. Илди дигира малхIямдешра биштIатас бяркъ бедлугухIели пайдаладарахъес багьандан, бегIлара Дигичевсили ва УркIецIичевсили гибти сари. Нушазирти хIял-тIабигIят кьалли нушани гIяхIил далути сари… ИмцIасигъуна манзил дигира малхIямдешра нушазир дирухIели, нушани пикрихIебирулра илди нушала уркIбази Илини даахъниличила ва дяхIимцIайзирван чедиъниличила. ДурхIни халабаибхIели, нуша алавчартани цацахIели илдачирад диги ва малхIямдеш чехIедиулра.

Рахли, илис сабабли нушани биштIатас диги чехIедиахъни ва ЧевяхIсилис шукру хIебирни биэс. Марлира, нушани гIяхIбаркь хIебалулрав ва сабурагартили дирулрав? Чили бала? Нушани нушаб гибси диги ва малхIямдеш хъумартурмад иличила биштIатанира хъумуртули саби.

Зайнаб

РиштIаси Зайнабли сунела дудеш валуси ахIенри. Ил вебкIибсири рурси риштIали лералли. Рурси ва илала узби ятимбиуб. Нушала Идбаг ﷺ дебали кьакьавикIусири ил рурсиличила ва узбачила. СенахIенну ит манзил дудеш вебкIни селра агарли калнигъуна сабри. Нушала Идбагли ﷺ илдас сунела уркIи гьаргбариб. Илини илала дудешла мер буциб. Ил илдас дунъяличив бегIлара гIяхIси дудешли ветаур. Зайнаб риштIали лералли, рурси ва илала неш лебси хъули айцIуси ахIенри, амма мурталра мякьлав вирусири. Рурсиличил хIязтавиркьи ва дазала дирути шин иличи чахьдири. Идбагла ﷺ хIерудилиур ил халараибхIели, ил илцадра жагасили ретаур, хIятта зиланти-ургар иличир жагаси гIур аги. Илис чеу бедибсири «даршдусла исбагьи» ибси. РухънараибхIелира илала дяхI-сипат жагали калунтири. Илра сабри нушала Идбагла ﷺ мугIжизат.

Ил мугIжизатлизиб нушабра гIибрат чебаахъили саби. ХIерудили адамла уркIи-хIяйчи ва тIабигIятличицун ахIенну асарбируси, илала кьаркьа кегIебдшличи ва жагадешличира саби. Дигиличил абикьурти дурхIни куц-кабизлизибра дяхIсипатлизибра жагатили халабиути саби.