Берцуди
Гьачам урхьначибад аркьуси гами цIакьси бурямлизи бикили кягIиб. Лебилра иличибти адамтазивад ца адамлис сабри верцес бикибси.
Ил рамчаначил урхьула дубла хибхIели, алавчарли чилра ва селра аги, гамила калунти бургIлуми ахIенси. Чумал бархIи ил алавти мер-мусаличив сай кьяйда верцес бикибси адам левал умцIули хьалли, чилра хIергиб. Ил рамчанани островличи лайвакIилри. Ил тIашагарли ЧевяхI-силис улгулри, сай верцахъес тиладиикIули. Гьар бархIи ил умутличил урхьуличи хIерикIулри, сунес кумеклис гами лябкьян или. Рамчаначил хибти уркьли ва чIигIя дучили, илини сунес къуш бариб, заблизивад ва мицIираглизивад верцес багьандан. ВацIа-кьадализир кьар ва цIедеш дурчули, урга-ургади бялихъуни дурцули, хIеркайрулри. Илкьяйдали илала бурхIни аркьулри.
Гьачам, сунес яшавлис се-биалра баргес дураухъи чарирухIели, илини сунела къуш цIализи гIелабикили чебаиб. ЦIала ва гавла тIал зубрачи абиулри. БегIлара децIагеси, гIурхIейс кабихьибси дерубти бялихъунала, цIедешла, кьарла ва цархIилти берклумала напакьара цIали бигублири. ДецIлизив ил вяв-чIярикIесииб: «Я Аллагь ﷻ, сен набчил илгъуна бетаура???» Ил висули ва улгули вахъхIи паргъатиэс хIейрулри… Ахирра вамсурли ускаун. Савли - жявли ил гамиличибад чехибси тIамали чеваргъахъиб.
Гамиличибти адамти ил верцахъес бакIилри. Ил илдачи ацIибмад илини морякунази хьарбаиб: «Сен-сен багьуррая хIушани ну ишав левниличила?» «Гьарахълабад хIела цIала ва гавла лишан чебаира», – жаваб бедиб илдани.
Багьи адам, хIела биштIаси къуш цIали бигалли, ил ЧевяхIсини хIу верцахъес бархьибси лишан саби.
НасихIят: камси зараллизи дикибхIели, гайцIхIедикIули, шукрубирес хъуммартидая. Белики илизиб биэс хIушала берцуди…
