Даргантала цадешла балбуц
Даргантала цадешла балбуц
ГIядатлибиубливан гьар дус дурабуркIуси Дагъистайзибси ГIиса Идбагла уличилси Динна Центрлизиб даргала халкьла халаси мавлид бетерхур. Ил РабигIуль-авваль базлизив акIубси нушала дурхъаси Идбаглис ﷺ хасбарибси шадлихъ саби. Иличиб даргала лерилра районтала халкь цалабикилри. БакIибти гIяхIлас миллатла палтарличилти жагьилти гьунибиулри. Шадлихъличиб даргала миллатла ваяхIличилси ва хурегуначилси майдан гьалабихьилри.
Балбуцлизиб бутIакьяндеш дариб ДР-ла Муфтиятла председатель ГIябдуллагь Салимовли, МяхIячкъала шагьарла бекI Юсуп Умавовли, шаригIятла гIилмуртала доктор ГIяхIмад МяхIяммадовли, балбуцла бекIливиубси сиптакар ГIумарасхIяб АрслангIялиевли, машгьурти динна гIялимтани, районтала бургани, депутатунани, спортсментани ва бахъал цархIилтанира.
Муфтиятла Председатель ГIябдуллагь Салимовли балбуц абхьиб ва цалабикибти ЧевяхIсини дурхъабарибси РабигIуль-авваль базличил мубаракбариб.
МяхIячкъала шагьарла бекI Юсуп Умавов гъайулхъули викIар: «ИшбархIи нуша иша цахIнадикилра иман цIакьбарес, ЧевяхIси Аллагь ﷻ ва илала Расул ﷺ гьаникахъес багьандан. Баркалла ишгъуна халаси балбуц дураберкIахъес нушаб имкан гибнилис ДР-ла муфтий шайх ГIяхIмад-Апандисра ил дураберкIибти лебилра адамтасра...»
Илар илкьяйдали гIялимтала вягIза-насихIятуни, мавлидуни, нашидуни зайдухъун. Балбуцла хIурматбарили унра республикализибад бакIибти узби-чячянтани мавлид белчIун.
ШаригIятла гIилмуртала доктор, Избербаш шагьарла имамтала Советла председатель ГIяхIмад МяхIяммадов гъайулхъули викIар: «Адамли сунела динна узбас кумекбирули левалли, ЧевяхIси Аллагьли ﷻ илисра кумекбируси саби. Баркалла багьахъес дигулра нушала балбуц гIеббуцибти лебтасалра: спонсортас, кумекчибас ва гьарил уркIи изути адамтас».
Даргантани гIяхIлас бизити хурегуначилти эркинти кьумурти, савгъатуни ва гIумра-хIяжлизи 10 путевка хIядурдарилри, сарира бакIибти-ургар чIала кабушили дедибти.
ЦIадикили, туристуначил бехIемцI кабикибси замана, илди берцахъес кумекбарибтас Ахъушала районна багьудлуми тIинтIдируси отделлис бекIдеш дируси МяхIяммад Рабадановлира савгъатуни дедиб.
Дарганти цабирнила балбуц разити аги-хIяйзиб бетерхур. Ахирличиб МяхIячкъалала АЗС-лизиб алхунти ва зараллизи бикибтас, дявила хасси балбуцлизибти бургъантас ва Палестинала халкьлис балга-дугIя делчIун.
Адамти илабад разиси гьавличил арбашулри, илдигъунти далдуцунани дарганти гьатIира уржахъниличи дирхехIе.
Наида Гъуруева
