Даргантала цадеш
Дурхъаси дуббуцарла Рамазан базлизир нушала республикализир, лебилра бусурмантани кьяйда гьар дус ифтарти дурадуркIнила жагаси гIядат бетаурли саби. Илдигъунти далдуцуни дурадуркIни дебали дигеси саби, сенахIенну илдани адамти цабирахъули, уржахъули, цаличил цала узидешла бархбасуни чIумадирули сари. Илала дурабадра дуббуцибти адамти бахнилизи пай кабихьибтас халаси кири бируси саби. Иличила Идбагла ﷺ хIядисра леб: «Дубуцибси адам дубватахъурсилис бируси ужра дубуцибсилисгъуна саби, амма иличибли дубуцибсилис шабагъат камбируси ахIен».
Илдигъунти далдуцни детурхули калун гьар бархIи МяхIячкъалала бекIлибиубси жумягIла мижитла гьалабси Рамазанна чятирлизирра. Илабси дуббат «Инсан» фондла кумекличил балкьарахъуси саби. Илкьяйдали декIар-декIарти адамтани: шагьарла администрацияла хIянчизартани, спортсментани, гIялимтани ва гьарилти дигутани чула харжанас дуббуцибти балхути саби. ГIядатлибиубливан илар дирар чумиздагуни, шин, кьацI, цIедеш ва буцIарси хурег - плов. Илаб дуббатурли гIергъи адамти бархIехъла дехIибайчи мижитлизи башар, имцIати илаб гIибадатличиб кавлан ва таравихIуни диру.
Ил тяхIярли Динна Центрлизирра базла гьарил бархIи Дагъистанна районтани ярга хIясибли дубкабалтнила далдуцуни – ифтарти дурадуркIи. Гьалабван даргантала районтани дураберкIибси ифтарра бетерхур. Ила цалабикилри даргала лерилра районтазибадти ва шагьуртазибадти халкь. Балбуцличир Кьуръа аятуни делчIун, нашидуни ва мавлидуни зайдухъун, динна гIялимтани вягIза – насихIятуни дуриб. Илаб гъайбухъун исламла гIилмуртала доктор, Дагъистанна муфтийла заместитель ГIяхIмад МяхIяммадов, муфтийла кумекчи ГIябдуллахIяжи Хидирбеков, ЦТО –лизивси республикала вакил ГIумарасхIяб АрслангIялиев, Къизларла имамтала советла председатель Шамиль БяхIяндгIялиев ва цархIилтира.
Балбуц разиси аги-хIяйзиб бетерхур. Иличир хъулри-тIашдалтуси компаниела шайзибад ва цархIилти спонсортала шайзирад гIумраличи путевкабас чIала бушиб. Лерилра путевкаби 8 лерри ва илди чIала хIясибли дутIиб.
Лебилра балбуцличиб гъайбухъунтани цалабикибтас дуббуцарлизир дурадуркIутигъуна гIибадатуни, дирути гIяхIти баркьудлуми ва садакьа цархIилти бурхIназирра дирахъес жибариб.
