ХIерили ва дугели камлис къуллукъбирни
ХIерили ва дугели камлис къуллукъбирни
Кам савлира бархIехъра умубиреная, гIур хIушала камличи балбиркуси журала кам кIантIибирахъуси крем бикеная. Гьар бархIи савли камличи ил мяхIкамбируси крем бикеная, илини хIушала кам берхIила нурлизибадра мяхIкамбиру нясра хIебирахъу. Дугели бакибси кремли хIуша дусуси замана дяхIла кам сагабиахъес имканбикIахъу.
ГIядатла камлис къуллукъбирни Тысячелистник гъяжбарили бархаибти шинничил савлира бархIехъра дяхI-някъ иценая. ИлхIели хIушала кам кIантIиси ва умуси бирар. ДяхIла кам сагабиахъес багьандан, байхъала хияр умубарили бибгIянбарая ва жунала бутIализи бергурли гIергъи, гъяжбарили, шин дураили, илди шинни итмадан кам бикуси саби.
ЦIедешла маскаби
Халаси кьулса бицIибти улелъа гъяждарая ца ягъуртIла кьулсаличил гъудурдарая. Ил гъудурмай дяхIличи ва хъябличи бакая, дяхI ванаси вяхIушкайчил кIапIдарая ва илкьяйда чумал минутлис батирая. ГIур дяргIибти шинничил маска бирцили убкасая. Ил бирни къулайси саби аллергия багьарбулхъуси, назикси камла бегIтас.
ЛямцIбикIуси камличи маска барес дигадалли, кIел гIинц умударили дибгIяндарая, цакамти лимонна шинра имцIадарая ва ил гъудурмай букIуси къат бетаэсли камличи бакая. Илкьяйда 10 минут батирая ва гIур шинни бирцая. Маскаби хIулби ва кIунтIубиалавти мераначи дирес асубируси ахIен.
Гьачам-гьатIи жагадешличила
ХIушала жагадеш мяхIкамбарахъес мурталра икьаладирули кавлан гьарра шайзибад балкабикибси хурег букни, даарила кьадарлизир шинкIадешуни дужни, къяббердни хIебиахъубли физзарядка дирни, умуси гьава ва бизиси гьанкI. КIантIиси бурушличив къакъ удили усалли, вяхIличир ва хъябличир чIучIубалхуни камли алкIниличила бурули саби.
Улелъа
БяргIибси кам паргъатбиахъес дигули диадалли, улелъара ягъуртIра дархаибси гъудурмай, букIуси къат бетаахъурли, дяхIла камличи бакая.
Пайдалати
БетIулизир дибгIянти жибжни хIедиахъес багьандан, илди лерси кьачIализи умухIебарибси итан жерши кабихьая. БетIу урга-ургади аргьурли, умуси гавлаглизи какьая. БуцIарси секIал кабихьибхIели хъа ваяхIличиб кавлуси цIуба дамкъа убасес вирар спиртра гIявадешра бархаибси гъудурмайли бакибси балала чIянкIили суркбиралли.
Кухняла шкафуназибси хIейгеси гягI убасес багьандан, урга-ургади кьанцIаличил шинкIабарибси чIянкIили суркбиреная. Хрустальла тIалхIяна дуцIарти шинничил ицалли, илди пIякькадиркур ва лямцI бетихъур. Илди ванати шиннизи крахмал бархаили ицалли лямцIдикIар. Шишала тIалхIяна: стаканти, вазаби ва цархIилти жявли умудирар ванати шиннизи зе ва кьанцIа гъудурдарили ицалли. Сагати шишала стаканти жявли хIедялчан илди дяргIибти шиннизи кадихьили, багьласи цIаличир руржесаили, илар дяргIяйчи даталли.
НАИДА ГЪУРУЕВА
