Хурег балкьарахъни

Табализибси пицца

БетIулис гIягIнидиркур:

гидгари – 2;

декь – 9 халати кьулса;

бурт – 4 халати кьулса;

майонез – 4 халати кьулса;

зе – 0, 5 чяйла кьулса.

ДухIна кадихьес:

руд – 100 гр;

помидор – 1;

шайтIа кьапIа – 1;

цIуба жерши – 1 бекI;

нуси пармезан – 150 гр;

 кетчуп яра томат – 1 халаси кьулса.

Гидгури хьулухьмаддикахъили, декь какьая ва гъудурбарая. ГIур бурт, майонез ва зе имцIадарили, гIяхIил гъудурдарили, бетIу башеная.

Пиццала бухIнабуц хIушаб дигусигъуна барес вирар, белкьунси диъла, гIяргIяла диъла яра вералибяхъибси рудла. Гьаланачи гIявадешли бакибси табализи бетIу кабихьили тIинтIбарая. ГIур кетчупли бакая. Илала чеди дурсибти руд, жерши, шайтIа кьапIа ва помидор кадихьили, теркаличибад дураибси нусили чедибад кIапIбарая. Камси цIаличи кабихьили, берцIахъес 15 -20 минут батирая.

Кивиличилси салат

ГIягIнидиркур:

киви – 2;

гидгури – 3;

хияр – 100 гр;

салатла кIапIри;

чIумаси нуси – 70 гр;

гIяргIяла диъ – 200 гр;

хIяжланкIи – 1 тIакьа;

зе, исиут, майонез – бизидеш хIясибли.

Белхьунси гIяргIяла диъ кесекунарбарая. Кьямлизи салатла кIапIри кадихьили, илдачи диъ кабихьая ва чедибад майонезли бакая. Илдала чедибад мявнаддарибти хияртала къат кабихьая, илдира майонезли дакая. ГIергъиси къат делхьунти, мявнаддарибти гидгуразибад барая, илдира чедирад майонезли дакая. ГIур ургабси тIярхъубачилси теркализибад дураибси нуси илдачи бекIабарили кабихьая ва майонезли бакая. Илдала чедибад дайхъу мявнадли бурсибси киви кабихьая ва чедибад хIяжланкIили жагабарая.

Имбирьла ва улелъала чяй

Шиниша чяйла кьар (заварка) чяйниклизи какьурли, чедирад ружери бакIибти шин картIая ва 5 минут датирая. Имбирь бирцили, кьисбарая ва чяйлизи кабихьая. Илкьяйдали ила улелъара дархаая. Чедибад чяйник салфеткаличил кIапIбарили, гIуррара 10 минут батирая.

Чяй стаканнизи картIибхIели, лимонна бутIнира дархаили, варъаличил держес вирар.

Беркала ашагьаб!

Наида Гъуруева