МухIяммад Идбагла ﷺ баракатла хьунри
ХIузаймала рурси Зайнаб
Нушала Идбагла ﷺ хьунул, муъминтала неш Зайнаб ХIузаймала рурси сари. Илала цаэсил мурул ГIябдуллагь УхIудла гъазаватлизив кавшиб. Гьижра хIясибли 3-ибил дуслизив МухIяммадли ﷺ ил карииб. Аллагьла Расулли ﷺ илис 400 диргьам дедибтири магьарла мас кьяйдали, ва ГIяйшала мякьлаб хъали барибсири.
Илис мискинтала неш или ирули бирар, сенахIенну илини мискинтас кумеклис садакьа бирес дебали къайгъибирусири. Ил мискинтачил дебали гIяхIли рирусири ва илдачи хIеруди бирусири. Иличил кабикибси анцIбукь гьанбуршехIе, ГIумар аль-Фарукь халифли вируси манзил. ГIумарли илис дахъал арц дархьибхIели, илди чедаили ил рикIар: «Аллагь ﷻ чевверхаб ГIумарличивад! Бусурмантала цархIилти нешанира илди арц дутIес лайикьти саби». Илизи бурибхIели илди лерил арц сунесцун дархьили диъниличила, ил рикIар: «СубхIянаЛлагь!» Ва илди арцличирад чебушалаличил кIапIриубли, рикIар: «Какьая иша ва кIапIдарая». ГIур илини хъарбариб илдазирад каш бицIили касахъес ва у ахъили пулан мискиннис духахъес, гIур цархIил мискиннис, гIур цархIил хъалибарглис ва илкьяйдали арцла бекIа камбиайчи. Калунти арцра илини илди дутIибсилис дедиб, илар 85 диргьам лерри.
Идбагличил ﷺ дарх илини 8 баз деркIиб, ва 30 дусла гIямрулизир шалгIеррухъун. Идбагли ﷺ ил БакьигIла хIябрази хIяририхьиб. ХIузаймала рурси Зайнаб Маймунатла нешгIерси рузи сарри.
Зайнабла гIямрулизир дахъал анцIбукьуни лерри илала гIяхIбаркьуначил ва садакьабачил дархдасунти. Илкьяйдали сахаватти бирутири Идбагла ﷺ цархIилти хьунрира. Илданира бирутири садакьа, гIяхIбаркьла кумек ва мискинтачи уркIецIичебли бирутири. Амма Зайнаб лебтазирад декIаррулхъусири.
ШаригIятли халаси пикри бяхIчииуси саби мас динна гьунчиб харжбирниличи ва гIяхIбаркьла кумек гIеббиахъниличи. Аллагьли ﷻ дахъал аятуни дархьибти сари адамти садакьа бирахъес жибирути, илкьяйдали ил бирнила манзилра чебиахъути. Ил тяхIярли чараагарли бедлугес гIягIниси садакьа (закат) ва цархIилтира жураби баяндариб, илди-ургар къадагъадарибти, хIейгести ва дигестира. Хаслира дурхъати бурхIназир ва бузразир дирути.
ЧевяхIси Аллагьли ﷻ гьарилла садакьа кьабулбараб!
