СанигIятлис марси

Бахъли ралуси, кагибси хьунул адам сари ахъушан ГIябидат МяхIяммадова. Мер-мерличир рузули, илини дахъал дусмазиб хIянчи бариб, барх бузутала хIурматличи лайикьрикиб. ГIергъити дусмазир ГIябидат пенсияличир сари.

Илини цархIилтас гIибратли бетаурти уршира рурсира абикьур. Илди саби ГIябдуллагь БяхIяндов ва Рукьият АрслангIялиева. ГIябдуллагь БяхIяндов бахъли вала. Ил Федеральное Казначействола районна управлениела начальникли 10 дусличивра имцIали бахъла баркалла сархесли узули сай.

Иш белкI сунес хасбируси Рукьият Ахъушала цаибил школала учительница сари. Разиси, гьариллис салам гьалабиркахъуси иличил ихтилатикIуси замана ГIябидатла кагибдеш, разидеш гьанарули, Рукьиятличила набзир дезнала ишди тугъи акIуб:

…Нешла насихIятуни
ХIилизи атIахъунси,
Адамтачи дигили
РицIили хIеррируси.

ДурхIнас — ванзала вавнас
Шалати дяхI карцуси,
Илдас багьудлумала
Урунж чяхIбикIахъуси.

Гьарил талихIла гьунчи
Гьунивватес гьалакси,
Къардулхъуси хIейахъес,
Къарауйчирван тIашси.

ХIекьти, хIялалти дугьба
ХIерумсули руртIуси,
Гьарил дурхIя игъбарли
Варгилицун дигуси.

Рукьият, хIу рагьаби
БегIла дурхъал талихIли,
Гьар мерличир рургаби
Аллагьла уркIецIили!

Шила дайлабси парклизибси шадлихъ ахирличи бикибси замана, дурхIнала ца кьукья парклизибад дурабухъун. Илдачи гъамриуб Рукьият АрслангIялиева. Ил дурхIнани алавруциб, бурусиличи лехIяхъиб ва, низамлизи кабизурли, шила дайлабси кьакьакад багьлати гунзрачил батбихьиб.

Сецадрив лаг-катхIел аркьу-лябкьути адамти илдачи хIербикIути. Лебтасалра саламла дугьби гьаладиркахъулри дурхIнани. ХIера, илди районна администрацияла мякьлабси жагьилтала центр мерлабиубси юртла гьала тIашбизур ва учительница Р.АрслангIялиевала дурутачи дигиличил лехIбизур.

— 6-ибил классла дурхIни саби. Ишаб бируси балбуцличи кибти саби. Илди 28-цад леб, рикIи, дурхIначи хIеррикIули, Р.АрслангIялиева.

— Сен-сен бучIулив дурхIни? Нешла мез хъумуртули хIебиэс? -- викIулра Рукьиятлизи.

— Юх, ахIен. Нешла мез хъумартахъес хIедирехIе нушани. СенахIенну илди агардиалли миллатра бетихъни якьинси саби, -- иб илини.

— Нешла мезла дарс нушани цацахIели ишдигъунти дугьбачил бехIбирхьули дирехIе:

…Дурхъати сари нушаб
АхIерси нешра, мезра,
Нешла мезли сабигу
Чихъбарибси даргара!..

2015 ибил дуслизиб Р.АрслангIялиевани пединститут таманбариб ва сари акIубси шила, Ахъушала, цаибил школализир учительницали рузес даимриуб. Мар саби, ил школализиб устадешчебти, машгьурти бахъал учительти леб. Илдала мисалти гIерисули, рузули, Рукьиятра бархтала хIурматличи лайикьриркули сари.

Р.АрслангIялиева дурсразирад акьуси замана дурхIнала бегIтачил гьунириули рирар. Илдани дарх ирзу белчIудиличил, бухъя-зегъаличил дархдасунти суалти. Ил баркьудилира дурхIнала бегIтас Рукьият дигуси адамли ретаахъурли сари.

— Нуни бучIахъули калунти кIел классла дурхIнани школа таманбариб. Иш 6-ибил класс хIябэсил саби — хIябэсил выпуск. Ишдира мурхьти багьудлумала бегIтили бетаахъес чекаризурлира — рикIи ихтилатла ахирлизир Рукьият АрслангIялиева.

…Гьардизабгу, Рукьият,
ХIела гIяхIти пикруми,
ХIулбуркIахъабгу дурхIни
Мурхьти багьудлумани!..

ПОЭТ, ЖУРНАЛИСТ

М.МЯХIЯММАДОВ