ТIабигIятла дармунти

ТIабигIятла дармунти

Итан жерши, имбирь ва лимон жявси заманаличибад Европалантани дармунти кьяйда пайдаладирутири. Илдани кьаркьа арадешлис халаси пайда лебху ва иммунитет ахъбурцу. Амма бегIлара мягIничебси – илдани хIила туми бертабазирад умули дихIу, холестерин гIяшбиру, дулекI умубиахъес кумекбиру ва грипплизивад уцахъу.

ГIягIнидиркур: 4 халати жершила бекI; 4 лимон; имбирьла биштIаси кесек; 2 литр шинна. Балкьарахъни:

1. Лимонти дирцили, камличил дарх дибгIяндарая. Жерши умубарили, лимонничил ва имбирьличил блендерлизиб бибгIянбарая.

2. Ил гъудурмай биштIаси шанглизи кабихьили 2 литр шинна чертIая.

3. Шанг цIаличи чекабизурли, ружери бакIахъая.

4. Ил бяргIяйчи батурли, улализибад бархьая ва шишализи кертIая. Ил дарман гьар бархIи дацI уркIиличил бужуси саби, яра укес кIел сягIят гьалаб. Жершила гягIличила пикримадикIудая, ил лимонни убису. Илгъуна дарман барили, бужалли арадеш ункъбирахъу ва кьаркьала агъулати секIайзибад умубирар.

Гемоглобин ахъбуцес ХIунтIена кьехIе 300 гр. ва набадари 300 гр. теркаличирад суркдарес, илдази 300 гр. варъала бархаэс. Лерилра цахIнадяхъили холодильниклизи кадихьая. БархIилис гьачам дуббатлис гьалаб 1 халаси кьулса беркайс 30 минут гьалаб букес. ЖумягIла бухIнаб гемоглобин ахъбирар.

ДяхIла камлис

Капусталичилси маскали берубси кам ункъбиру. Капустала кIапIрачи руржути шин чертIая, илди кIантIидиайчи. Шиннизирад дурасили, маслали дакая. Ил тяхIярли гIявадарибти кIапIри дяхIличира хъябличира кадихьили 20 минут датирая. Илди урасили гIергъи, пIиргъикI вавала (ромашка) ванати шинничил дяхI дирцая. Ил маска жумягIли гьачам бирес вирар.

УркIилис пайдаласи

Гьар бархIи корицалара варъалара гъудурмайли бакибси кьацI букеная. Илини кьаркьайзибси холестерин камбиру ва хIила туми умудиру. Илкьяйда илини адам инфарктлизивад уцахъу. Гьалаб инфаркт бетаурли биалли, кIинайсра хIебиахъес кумекли бирар.

ХIЯДУРБАРИБСИ-П.МЯХIЯММАДОВА