МухIяммад Идбагла ﷺ баракатла хьунри
Зайнаб бинт ЖахIш
Нушала дигуси Идбагла ﷺ хьунул рирусири ЖахIшла рурси Зайнабра. Илала неш Умайма бинт аль-МутIалиб - Аллагьла Расулла ﷺ дудешла рузи сарри. Аллагьла Расулли ﷺ ил сунени айкьурси Харисла урши Зайдлис шери редибсири. Зайд Хадижас ведибси лагъ сайри, суненира гIур МухIяммадлис ﷺ ведибси. Идбагли ﷺ ил акьуватурсири ва сунела дигуси уршиван айкьурсири.
МухIяммадла ﷺ идбагдеш бехIбихьайчи гIярабунала гIядат лебсири урхIла биштIати вегIлис сайсес, ва илди чулайзи халбарили букьурла мас илдас балтес. Илкьяйдали ил гIядат хIясибли, урши сунес касибсилис къадагъабирусири илала гамъа хьунуйчи хъайчикаахъес, сунес сасибси урши вебкIили гIергъи яра декIарикили гIергъи.
ЧевяхIси Аллагьли ﷻ ил гIядат убкасиб. Ва Аллагьла ﷻ хъарбаркь хIясибли? МухIяммад Идбаг ﷺ Харисла урши Зайдла хьунуйчи хъайчикайибсири, илди декIарбикили гIергъи. Ил шайчиб ЧевяхIсини хасси аят бархьибсири. Ил багьандан Зайнаб разириубли рикIусири: «ЦархIилти хьунри илис чула дудешунани, узбани, яра гъамтани шери бедибтири, ну биалли ЧевяхIси Аллагьли ﷻ редибсира ил аятлизибси хIясибли».
Илис Барра бикIусири, амма хъайчикайибхIели Аллагьла Расулли ﷺ илис Зайнаб у бихьибсири.
Идбагла ﷺ хъулир ил жагали ва гIяхIси даражаличир хIерриубсири. Ил дебали динничи чекаризурли рири, Аллагь ﷻ сунечи разили калахъес ЧевяхIсилис даим гIибадат бирусири. Илини палтар ибусири ва иличибли мискинтас садакьа барести харжанас арц дурчусири.
ГIяйшани (р.гI.) иличила бурусири: «Нуни дила гIямрулизир илгъуна динничи чекаризурси, бархьдеш дигуси, алавтала ихтиюрти хIедулъуси ва мискинтас чIянкIли Аллагь ﷻ багьанданцун садакьа лугуси хьунул адам чехIераира».
Аллагьла Расулли ﷺ сунела хьунрази бурибсири, наб гIергъи хIушазирад бегIлара духъяна някъбала регI ахиратлизи аркьян или. Цараван буралли сахаватдешличила сари гъай. Илгъуна биалли Зайнаб сарри. Идбагли ﷺ бурибси кьяйдали ил сунес гIергъи ребкIиб, гьижрала 20 - ибил дуслизир, 53 дусла гIямруличир. Илис жаназала дехIибала дарибсири бусурмантала вегIбекI ГIумар ибн аль-Хаттабли.
Илгъуна сарри Идбагла ﷺ хьунразирад бегIлара сахаватси ЖахIшла рурси Зайнаб. Аллагь ﷻ разили калаб сунечи! Амин.
