ПасихIти бакьалаби
ПасихIти бакьалаби
Гъармука ва хьунул адам
Гьачам ванзурби дуцес ургъули, чябхъинти дирули чевхъунси вегIбекIла къаравашунани бахъал адамтира ясирбуциб. Илдиургаб ца хьунул адамла тухумтира лебри. Гьандуцес хIериубли, децIлизирси хьунул адам ил вегIбекIличи ракIиб. Илала урехиагардешличи тамашабиубли къаравашунани ил вегIбекIличи рукиб. Хьунул адам илизи сунела гъамти азадбатахъес тиладирухъун. Баргили илала тухумти, гьала киб ва хьарбаиб:
«ХIера, ишди лебилра хIела гъамти: мурул, узи ва урши. ХIу набзирад уруххIериъни багьандан, илдазивад нуни ца акьувалтас, чи декIарвирида?», - хьарбаиб вегIбекIли. Пикрилра хIерухъи ил рикIар: «Узи». Я мурул, я урши декIарбирниличи хIерси вегIбекI тамашавиубли, викIар:
«Аргъахъа набзи, сен?» Хьунул адам рикIар: «Мурул нуни варгес рирус, урши варкьес рирус, узи биалли, нуни акIахъес хIерирус». ХIяйраниубси вегIбекIли хIябалра азадбатур.
КьацI
Мурулра хьунулра хъайчикабиили 30 дус биублири. ГIядат хIясибли, гьар бархIи кьяйда ил бархIира хьунуй бизиси кьацI берцIиб. Хурегли букес кабиибхIели, хьунуй ил кIел бутIаличи бутIиб. Чедибси бутIа гьалаб кьяйда муруйс бедес или гьабуцибси някъ, бай гьунчиб тIашбизур…
Ил пикрирухъун: «Нушала байрамла хIурматлис, иш гьакIлис нуни букас ил берцIибси кьацIла чедила. Ну иличила мурталра хьулрикIусири. НукIун илис марси гIямрула гьалмагъли калунра, гIяхIти дурхIни халабаахъира, хъали-цIа бекIдарира, сецад цIакьани ва арадеш харждарира нушала хъалибарглис».
Илдигъунти пикрумачил, илини руржуси някъли, 30 дусла гIядат буи, кьацIла удибил бутIа муруйс гьабуциб. «ИшбархIи хIуни наб дебали мягIничебси савгъат барири, ахIерси! 30 дус нуни ил бутIа дигули хьалли хIебукусири, ил хIела саби или гьанбиркули». ЦацахIели, вегIла пикруми бекIлизирцун хIедатурли, илди дуресра гIягIниси биъни, иш хабарлизибад гIячихъли саби.
