ДехIибайчила

ДехIибайчила

ДехIибайс гIергъи балга барни – суннат

ДугIя гIибадат саби ибси хIядис лебси саби. ДехIибайс гIергъи бируси балгала (дугIяла) дебали дахъал жураби къаршидиркур, ил гьарилли сунеласун биру.

Ишаб ца жура гьалабирхьулра:

«АльхIямду лиЛлагьи раббиль гIяламин. Аллагьумма салли гIяла сайидина МухIяммадин ва гIяла али сайидина МухIяммадин ва саллим».

Астагъфируллагь – 3 -на.

Я Раббаль гIяламин! ХIу багьандан гьалар дарибтира ишбархIи дарибтира дила дехIибала халисдарили, дурусдарили, хIебицIибси чебицIахъили, гъарацIуначивад чевверхурли кьабулдара.

Я Раббаль гIяламин! Нуни делчIунти Кьуръа сурабира, тавхIидла «Ла илагьа илла Ллагь» ибси калимара, истигъфарра, салаватра, хIед бируси гIибадатла цархIилти журабира дурусдиахъубли кьабулдарни тиладибирулра.

Я Гъафурур ряхIим! УркIецIибара набчира, дила бегIтачира, МухIяммад Идбагличира ﷺ, илала хъалибаргличира, хIела мякьлаб дурхъали биубти лебилра шуйхрачира, авлияуначира, салихIинтачира, шагьидуначира.

Я Раббаль гIяламин, илдала баракатра шафагIятра набчира, дила хъалибаргличира, урши-рурсиличира, узи-рузиличира, унра-хунраличира, гьалмагъ-тянишуначира, шанти-жамигIятличира чесадаахъа ва илди ХIела уркIецIилизибад мяхIруммабирид.

Я Гъафурур рахIим! Дунъялизибра ахиратлизибра чула баракат набчи чесабаэсти муъминти унрубира кьадарбара.

Я Гъафурур рахIим! Нуни гьалар дарибтачивадра, гIур дарестачивадра, далули дарибтачивадра, хIедалули дарибтачивадра, дакIули дарибтачивадра, дигIяй дарибтачивадра, чеввалкIи дарибтачивадра, нунийчирра ХIуни ункъли далути бунагьуначивад чевверхи, я дила Аллагь ﷻ.

Дила имайзира, ризкьи-давлализира, арадешлизира, гIямрулизира баракат кабихьа, дунъялизивра ахиратлизивра вархьвараба.

Я Раббиль гIяламин! Дила деркIес калунти гIямру ХIед халисил тIагIят, дурусил гIибадат бирахъули, ХIу багьандан вет-садиркахъули, ХIу разивиэсти гIямултагIив умцIахъули хIу гьимукIахъести хIял-тIабигIят, баркьудлуми дархьдалтахъули деркIахъа.

УбкIухIелира имайчилси бебкIа кьадарбара. ХIябла хIисаб-суайс жавабтазив вархьизахъаба, хIябла гIязабтазивад хасарватаба. МяхIшарла Диванна бархIи, дила гIямултачи хъарикахъили, къарцинмайраба, наб ХIела уркIецIи хIясибли хIукму бара, я уркIецIила ВегI Аллагь ﷻ!

Я Кьудратла ВегI Аллагь ﷻ! Дила деркIес калунти гIямрулизир набчи дяхIдиубти, делкIунти балагь-кьадар, къиян-жапа, излуми-зугIяла лерли диалли, илди лигIматуни-гIяхIдешуначи шурдатни тиладибирулра, ХIу ахIенси тиладиухъеси чилра агарану.

Аллагьумма салли гIяла МухIяммадин ва гIяла али МухIяммадин ва саллим.

бихIурмати сирри сурат-иль-ФатихIя». КIинайс иру: «Амин раббаль гIяламин». «Я Аллагь ﷻ! Нушала балга кьабулбара», яра «Я кIелра дунъяла Пача, нушала балга кьабулбара!»

 ДехIиба суннатуни

1.«Аллагьу акбар» викIухIели, авал анцIбукьлизир някъбала хала тIулби лихIбачи адаайчи ахъдуцни:

1)ДехIиба бехIбихьудлизир (такбируль ихIрамлизир).

2)РукIугIлис гьалар.

3)ИгIтидальлис вархьирули.

4) «Ат-ТахIийятулис» («Ташагьудлис») гIергъи хIябъибил ракагIятлис алзухIели.

2. «Аллагьу акбар» кабиран вальхIямду лиллагьи…» белчIни.
3. «Аль-ФатихIялис» гьалаб «АгIузу…» белчIни.

4.Цаибил ракагIятлизиб «Важжагьту» белчIни.

5. «Аль-ФатихIя» белчIес балуй някъли алгъай някъ буцни.
6. «Аль-ФатихIя» белчIунхIели, «Амин, я раббаль гIяламин» ибни.

7.Цаибилра кIиибилра ракагIятуназиб «Ал-ФатихIялис» гIергъи Кьуръа цархIилти сураби дучIни.

МухIяммад-хIяжи Рабазанов