Аллагьала ﷻ дурхъати уми
Аллагьала ﷻ дурхъати уми
1. АЛЛАГЬ ﷻ
Цаси Аллагь ﷻ. Ил Аллагьла ﷻ бегIлара чебяхIси у саби. Ил чи саял белгибируси. Ил ули сунези духIнадурцути сари Аллагьла ﷻ лерилра пергерла 99 у. ЧевяхIсила пергер уми цархIил чисалра дихьес асубируси ахIен.
2. Ар – РАХIМАН
Гьар шайчивад РяхIмучевси, дахъал гIяхIдешуни дируси. Сунени акIахъубти лебилраличи иш дунъяличив РяхIмучевси: бирхутачира хIебирхутачира, бусурмантачира ахIентачира. Ил ура чисалра цархIиллис бирхьуси ахIен. Аллагьла ﷻ ЧебяхIси уркеци саби бирхути акахънилизиб ва иман бедили бархьси гьунчи кабизахънилизиб. Илини илди гIергъити гIямрулизиб талихIчеббиру ва Cай чеахъес имкан луга. Ил бегIлара УркIецIичевси сай.
3. Ар - РАХIИМ
Мурталра уркIецIи дакIубируси, ахирагарси уркIецIила ВегI. Итил дунъяличиб бирхутачицун уркIецIи дакIубируси, сунес мутIигIти лугърачицун уркIецIи бируси. Ил ули бирхутачи Аллагь ﷻ хаслира разили виъни иргъахъуси саби. Илини илдачи уркIецIи бариб илди алкIахъухIелира, илди бархьси гьунчи бяхIчииухIелира, илдас ахиратлизибра уркIецIибиру. АР-РяхIман ва АР-РяхIим умазив Аллагь ﷻ аргъибсили чеббалкIунти Аллагьла ﷻ гьунчи кабизахъес къайгъибиру. Илдас кьадинра Аллагьлизи ﷻ улгули, илдачи уркIецIи бирахъу. Кьудратла ВегIли илдачи Сунени акIахъубти цархIилтачира уркIецIибирахъес хъарбиру. Илис Сунес мутIигIти Сунела лугъри дигахъу.
4. Аль - МАЛИК
Кьиямала бархIила ВегI, гьарли-марси пачяхIдеш дируси Ил сай. Аллагь ﷻ сунес сай ваибси сай, чичилра хIяжатиркуси ахIен, лерилра гIелар калунти секIал илини акIахъубти сари ва илизирад дигахъути сари. Илала вархкья левси ахIен. Я чилилра Илис хъарбаркьуни дедес вируси ахIен. Ил чилалра шайчибад кумек баргес умцIуси ахIен.
Ил сунела мулкла ВегI сай ва илав сунес дигута виркьуси сай: дигусилис бедесра вирар, хIейгусилизибад кебасесра. Ил улизив Аллагь ﷻ аргъибсили сунела рухIличил, кьаркьайчил, хIяланачил мутIигIдеш чедиахъу. Гьар секIал Кьудратла ВегIлис къуллукъличи кайу. Аллагьла ﷻ пачадешлизиб балликьянаби агара.
5. Аль - КЬУДУСС
Дурхъаси, бегIлара умуси, нукьсандешуни агарси, сунечир гIяйибти агарси, лайикьагарти гьарсекIайзивад умуси. Иличи мешути, Иличил цугти лебти ахIен.
Илала у аргъниличибли Илала лагълис бируси гIяхIдеш дагьри дархьагарти пикрумазибад умубиъниличил багьарбулхъуси саби, илизиб васвасъалалис, гIердирес, левсиличив гIяхIсили чейахъес хIяжатдеш лебси ахIен. Вирхуси адамла рухIлизиб Аллагьли ﷻ ил ула мер баргили бируси саби. Ил багьандан илала рухIлизи нясдеш букьес бируси ахIен.
6. Ас - САЛАМ
Даршубируси, баршибси, Сунела гIяхIдешличил декIарулхъуси. Сунезир нукьсандешуни агарси, баркьудлумазибра сегъуналра жагъал агарси. Сунела лугърас бируси гIяхIдеш Сунезибадцун кабиркуси.
Ил сунела рухIлизи минабиубсили Аллагьли ﷻ гIяйиббареси хIебиру, илала динничи ва шаригIятличи къаршиси барес хIейрар.
7. Аль - МУЪМИН
Сунела лугърачил бигьунси вягIдалис марси, сунела марти лугъри гIязабтазибад уцахъуси. Урехила ва вайдешла гьунчибад хIебашахъес мяхIкамдеш бируси. Илини саби урехи чебарбикуси, илала уркIецIиличил саби паргъатдеш хьурабируси. Илини саби нушази гIяхIдешличи аркьуси гьуни чебиахъуси, нуша дерцахъес дармандируси Ил сай, нуша хIердиахъес кьацI-шин лугуси, Ил сай нуша дерцахъес музаулхъуси, Ил сай Сунени акIахъубти дихIуси.
8. Аль - МУГЬАЙМИН
Сунени акIахъубти дихIян, илди къелгIердикан, сунени акIахъубтас гьар секIал диран, илдас замунти кадилзахъан, илди дихIян Ил сай. Сунени акIахъубтала баркьудлуми къелгIердикан, илдала гIямрулис гьуни чебиахъанра Ил сай.
Ил уркIили аргъибси адам мурталра Аллагьличи ﷻ разили вирар, илала кьасличи къаршили дурахIелхъан ва сегъуналра анцIбукьлизив Илала гъайличивад чевхIелхъан.
9. Аль - ГIЯЗИЗ
Кьуватла ВегI, удихIеркуси, чевяхIдешличил декIарулхъуси, цIакьсигъуна, мутIигIхIейкIуси, бегIлара чевяхIси. Сунечил цугси яра сунечи мешуси гIур селра биэс хIебируси, сунечи халаси хIяжатдеш лебси. Кьудратла ВегI Аллагь ﷻ ца сай, илала гьалмагъуни лебти ахIен я илдачи хIяжатдеш лебси ахIен. Амма нушазивад цалра Иличи хIяжатхIейкес хIейрар.
10. Аль - ЖАББАР
Халаси Кьудратла ВегI, пасихIдешли гьар секIал алавдуцибси. Гьар секIал илала кьаслизирад дигахъуси. Илала кьас бетхIеберхурли кавлуси ахIен. Сунени акIахъубси гьар секIал мутIигIдиран. Сай биалли чичилра лехIихъуси ахIен ва чилра Илала арилизивад ухъес вируси ахIен. Илала ихтиюрти дуцес дигути зулмукарти илини мутIигIбикIахъу. Илини лебилра бебкIалис мутIигIбариб.
11.Аль - МУТАККАБИР
Гьарли-марси чебяхIдешла цацун левси вегI. Гьар секIайчив чевяхIси. Сунени акIахъубти сипатуначив чевяхIси, илди сипатуназивад умуси. Сунечил цугдуцибхIели, сунени акIахъубти сипатуни селра ахIентили чедиуси, сенкIун Ил сай ахIенси пахрубирниличи лайикьси левси ахIен. Илини пахрубирули сай сунесцун ахIенси акIахъес асухIебирниличи, сунела хъарбаркь уббяхъес вируси агниличи. Сунечи хамли гъамбирути илини лебилра дарбядягъинбирули сай.
Ил у мурхьли аргъибсили Аллагьли ﷻ акIахъубтала гьалар хамдеш чехIедиахъу, сенкIун кьяркьдешра бархьагардешра – вегIли вегI ахъурцнила лишанти сари. Кьяркьдеш Аллагьла ﷻ лугърачи хасси лишан ахIен. Илди чула вегIлис мутIигIтили ва иличи лехIихъутили биэс гIягIнити саби.
12. Аль - ХАЛИКЬ
Гьар секIал лерси тяхIярли чедиуси, илдас гIибратуни хIедургули, сунени акIахъубтала кьисматуни белгидируси. Сунес дигути акIахъес вируси. ИлхIелира селра агарли биаллира. Устнира илдала устадешра акIахъубси, санигIятуни белгидарибси, гьар секIайс умцла кабизахъурси, илди акIахъес гьалабал илдас лишанти дедибси Ил сай.
13. Аль - БАРИГI
Гьар секIал алкIахъан. Сунела кьуватличил гьар секIал акIахъубси. Ил – алкIахъан сай, гьар секIал Илини сари акIахъубти сунени белгибарибси тяхIярли. Ил барес багьандан Илис сегъуналра къиян кабихьес хIяжатбиркуси ахIен. Илини селизи биалра «бетаи» ирули сай ва ил бетарули саби.
Ил ула мягIна аргъибсили сай акIахъубсилис ахIенси чисалра лагъдеш дирути ахIен. Илчицун сай дугьаилзусира, Илизибад саби кумек бургусира. Илизицун асубирар биъхIебиуси гахъес тIалаббиресра.
14. Аль - МУСАВВИРУ
АлкIахъуси. Сунени акIахъубти секIайс жураби кадилзахъуси, цализирад итилти декIардирес имканбикIахъуси. ЦархIилтайчил сипат мешухIебиркахъуси.
15.Аль - ГЪАФФАРУ
Чевурхуси. Чевурхуси цайли цаси, сунени акIахъубтала бунагьуни дигIяндируси, илдачивад иш дунъялизивра итил дунъялизивра чевурхуси. Пергер лишанти чедаэс вирутили детарахъуси, сунела лугъри пергерти бетарахъуси, илдазирти нукьсандешуни дигIяндируси. Илини илди нукьсандешуни иш дунъяличирра дигIяндиру, итил дунъялизирра илди багьандан бунагьуни чехIедирхьу. Илини адамлизирти, ил чеэс жагаси виъни багьандан, илизирти нукьсандешуни дигIяндариб. Илини чесиб сунечи дугьабизуртазивад чи пашманиубли виаллира сунезирад кадикибтачи, илдачивад чевверхес. Вайти баркьудлуми гIяхIтачил дарсдарес чесиб.
Ил ула мягIна аргъибсини сунезирти лерилра нукьсандешуни ва цархIилтала нукьсандешуни дигIяндиру, илдачи чевурхули гъамирули.
16.Аль - КЬАГЬГЬАРУ
БекIдешдируси, хужаимдеш дируси. Сунела кьудратличил акIахъубти лерилра секIал мутIигIдируси. Сунени акIахъубтази сунес дигахъуси бирахъуси, илдас дигниличи яра хIейгниличи хIерхIеили. Сунела Кьудратли гьар секIал мутIигIдакIахъибси.
