АЛЛАГЬЛА ﷻ ДУРХЪАТИ УМИ

78. Аль – ВАЛИ

Лебдешлис хужаимдешдиран. Илини гьар секIал Сунес дигуси кьяйда ва пасихIдешличил детурхахъу. Чили тикрарбиралра ил пергер Аллагьла ﷻ у 99-на, илис гьанагарти балагьуназибад берцуди бирар. Тикрарабирули ил ура вегIла хъули уфиралли, вайдешлизибад берцуди бирар ин шаа Ллагь. Душман мутIигIварес багьандан (вегIла нафсра бархли) ил у 11-на тикрарбирес чебиркур вегIлис дигуси манзил яра душмайчил къаршивикес гьалаб.

79. Аль – МУТАГIАЛИ

ЧевяхIси. Ил акIахъубтала васвасъалала чедив сай. Иличи мешуси цалра агара. ЧевяхIсила хIекьдеш, даражаби, баркьудлуми Сунени акIахъубталайчи мешути ахIен, сенкIун Илала уми пергерти сари, лишанти биалли бегIлара ахъси даражала ва черяхIти сари. Аллагьла ﷻ жагаси у мурталра тикрарбирни сабабли, лерилра адамла челукьути масъулти арзили дирар, ин шаа Ллагь ﷻ. Илала дурабадра адерхурти цакьанира чардулхъан.

80. Аль – БАРРУ

Тиладибарибси секIал лугуси, уркIецIибируси ва гIяхIдешбируси. Ил Аллагьла ﷻ пергерси у гьар бархIи 7-на тикрарбирусилис, ин шаа Ллагь ﷻ халати бунагьуни дирнилизибад – держ дужни ва хIяжатагарти бархбасуназивад верцес вирар. Ил у даим тикрарбирни сабабли иш дунъяличи диги аркьян. Ил у 7-на белчIи акIубси виштIасиличи уфъалли ил вайдешуназивад уцахъу, ин шаа Ллагь.

81. Ат – ТАВВАБ

Чевурхан. Тавба кьабулбиран, тавбадарахъес гьуцIиран. Пикруми-кьасани къияндешуни агарли детурхар ил пергерси Аллагьла ﷻ у чуйнара тикрарбиралли. Чили ил у 10-на тикрарбираллира зулмукарла шайзибадси гьар журала вайдешлизивад верцес вирар. Гьар бархIи ил у ЗухIа дехIибала дарили гIергъи 360-на тикрарбируси Аллагьли ﷻ уркIи-уркIилавад пашманвиубли, тавбадарибси бархьси гьунчи калзахъу.

82. Аль – МУНТАКЬИМ

Бунагькартас лайикьси танбихI бируси, илдази багьахъурли гIергъи ва илди пашманхIебиалли ва тавбахIедаралли. ГIязабуркIуси ва илис къаршидеш дарес хIейруси виалли ил пергерла Аллагьла ﷻ у тикрарабиралли хIябал жумягI бархIи гьаб-гIергъили, бархьдеш кабилзан, ин шаа Ллагь ﷻ.

83. Аль – ГIАФУВВУ

Бунагькартачивад чевурхуси. Илдала бунагь дигIянбируси ва вайти баркьудлуми умудируси. Аллагь ﷻ чевурхар ил пергерси у чуйнара тикрарбирусиличивад. Дебали маслигIятбирули саби ил у тикрарбарили гIергъи ишгъуна дугIя бирахъес: «Аллагьумма иннака гIафуввун, тухIиббуль гIафва, фаъфу гIанни». МягIна: «Я Аллагь ﷻ! ХIу чевурхан сайри. ХIед чевурхесра дигахъид. Чевверхи набчивад».

84. Ар – РАУФ

УркIецIичевси, ламус-хатирбируси, малхIямси, кьяркьдеш ва чурхдеш агарси, ряхIмучевси. Бунагькартала тавба кьабулбируси, илдала бунагь дигIянбируси, чевурхуси. ВегIла гьимиличив чедивикес багьандан белчIес чебиркур салават-дуруд (камасаллайта, тахIиятла гIергъиси бутIа, гьарил дехIибайзиб гIергъиси ракагIятлизиб бучIуси):

«Аллагьумма салли гIаля МухIаммад ва гIала али МухIаммад кама саллайтIа гIала Ибрагьим ва гIала али Ибрагьим. Аллагьумма барик гIала МухIаммад ва гIала али МухIаммад кама баракта гIала Ибрагьим ва гIала али Ибрагьим, фи гъаламина ва иннака хIамидум-мажид» 10-на, гIур ил Аллагьла ﷻ у 10-на тикрарбарес. Ин шаа Ллагь, илала гIергъи ряхIятдеш ва паргъатдеш бирар. Ил у чуйнара тикрарбирусиличи лебилра дигиличил хIербикIу. Илала дурабад Аллагьла ﷻ баракат бирар ва кьяркьси начальникличил гъайикIес гьамадли бирар.

85. МАЛИК аль – МУЛЬК

ХIекьси арила вегI. Аллагь – лебилра лебдешла ПачяхI. Цаси, Сунес дигуси биран. Чилра левси ахIен Илала бируси уббяхъес вируси. Ил Аллагьла ﷻ пергерси у бахъхIи тикрарабиран шабагъатла вирар давлаличил ва баракатличил.

86. Зул – ЖАЛАЛИ ва-л – ИКРАМ

Хасси чебяхIдеш лебси, хIурматла ва гьар селрализивад айкибси. БегIлара ахъси ва чебяхIси даражала ВегI, чевяхIварес лайикьси. Аллагьли ﷻ хIурмат луга ил у бахъхIи тикрарбирусилис.

87. Аль – МУКЬСИТI

БархьдешгIевси, низам-кьяйда кадилзахъуси. Илини зулмукартас чеббирцIу зулмулиубтас кьадин ва бархьдеш кабилзахъу. Чили ил Аллагьла ﷻ у тикрарбираллира, шайтIайзирадти жура-журала васвасъалализивад верцес вирар. Се-биалра бируси секIал бетерхахъес багьандан ил у 700-на тикрарбирес чебиркур.

88. Аль – ЖАМИГIУ

Цалабирхъян, итил дунъяличиб учибирхъян. Cунени акIахъубти Диванничи цалабирхъян. Тухумти цалабяхъес, сабира дявтала, мерсдакьнила, шин чедидухънила замана декIарбикили беткахъибти гIягIнибиркур лебил кьаркьа умудеш барили, дазала дарили ЗухIа-дехIибала дируси заманала манзил някъби закличи ахъдуцили ил Аллагьла ﷻ у вецIна тикрарбирули тIулбачил бейгIес. Илала гIергъи дугIялизирван дяхIличирад някъби хIяршдарес. Беткахъибси баргес багьандан, чуйнара уркIи-уркIилабад бучIа ишгъуна дугIя: «Аллагьумма йя жамигIан-насили яв милларайба фигьи иджмагI даллати».

89. Аль – ГЪАНИЙУ

Давлачевси. Сунени акахъубси чизивадалра ва селизибадалра хIяжатдеш агарси, Сунезибад лебталалра хIяжатдеш лебси. ЧевяхIси Аллагьли ﷻ Сунела лугърас дахъал лигIматуни лугути сари, мицIирхIелира бебкIибхIелира. Халаси гьарбизни хIерли саби ил жагаси Аллагьла ﷻ у гьар бархIи 70-на тикрарбирутас. Гьар журала изайзивад сагъвиэс багьандан ил у чуйнара тикрарбируси саби ва кьаркьайчи уфируси саби.

90. Аль – МУГЪНИ

Давлачеббирахъан, Сунес дигути давлачеббиран. Цалралис давла лябкьуси ахIен Аллагьлис ﷻ дигалли ахIенси. БекIахъудила ва рухIлашайчибси давла бедили бирар иш пергерла Аллагьла ﷻ у 1111-на бучIутас 11-йна илис гьалаб ва гIергъи салаватра белчIи.

91. Аль – МАНИУ

ТIашиан, мяхIрумвиран. Сунес хIейгусилис хIелугуси, ил ахтардиварес багьандан яра ил вайдешлизивад мяхIкамварес багьандан. Ил Аллагьла ﷻ у 20-на бурушла кайхьи тикрарбиралли мурулла (хьунулла) цахIебалгундеш чебаркьян ва дигиличира гъамдешличира шурбулхъан. Ил у бахъна тикрарбируси вайти анцIбукьуназивад верци вирар. Илкьяйдали ил у бучIес вирар хIекьси мурад бартаахъес багьандан.

92. Ад – ДАРРУ

Къияндешуни дурхьан сай. ЦацабехIти Сунени акIахъубтас вайдеш биран, Илини ахIенси чилилра чисалра вайдеш барес хIейрар. ВегIла адабчебдешлис урехи хIебиахъес багьандан, ил пергерси Аллагьла ﷻ у 100-на тикрарбирар жумягI дуги. Илкьяйдали ил бучIуси рухIлашал давлачеввирар ва Аллагьличи ﷻ гъамвирахъу.

93. Ан – НАФИГIУ

ГIяхIдеш дигуси, гIяхIдеш бихуси. Илала ахъри агарли чилилра гIяхIдеш барес хIейрар. Ил жагаси Аллагьла ﷻ у машиналичив яра гамиличив сафарличи дураулхъухIели бучIан лерил журала урехилизивад ва къияндешуназивад верцес вирар ин шаа Ллагь. Ил у 41-на сегъуна-биалра хIянчи барес гьалаб тикрарбаралли, бируси гIяхIил бетурхар. ВиштIаси акIубли дигусини ил у бучIалли бегIтачи лехIихъути, Аллагьличи ﷻ бирхути дурхIни алкIан.

94. Ан – НУР

Шалабиран, шала луган. Аллагь – ванзала ва зубрала Шала. Ил Аллагьла ﷻ у сура «Нур» белчIи гIергъи 1001-на тикрарбиралли, яра гьаман тикрарбиралли ил адамла уркIи нурли бирцIу. Цундешлизив, чизилра гъайхIейкIули 2 ракагIятла суннат-дехIибала дарили, илис гIергъи 7-на ил у белчIалли, бигIунси яра беткахъибси секIал муэрлизиб чебаэс вирар, ин шаа Ллагь.

95. Аль – ХIАДИ

Бархьси гьунчибад бикан. Cунени акIахъубти бархьбиран, илдас бархьдеш чебиахъули. ДугIя бирухIели кьяйда някъбира кадуцили, закличивяхI хIерикIули ил Аллагьла ﷻ у чуйнара тикрарбаралли, илала Аллагьличи ﷻ бирхауди имцIабирар, иман цIакьбирар, ва хIекьли бархьси гьунчи вархьиру. Ил у бахъхIи бучIалли адабчебси багьуди имцIабиру.

96. Аль – БАДИГI

Сагаси секIал алкIахъан. Сунечи мешуси агарси я хIякьикьатлизиб, я арилизиб, я баркьудилизиб. Ил у 1000-на тикрарбируси «Йя БадигI ас-самавативаль-арз» или, пашмандешлизивадра, шишимала-анцIкьилизивадра верцахъили иманчебси бебкIали убкIар, ин шаа Ллагь. Ил барес бегIлара гIяхIси манзил саби магърибла ва иша дехIиба ургаб (4-ра 5-ра дехIибала). Сегъуна-биалра урехи лебси балбуц дураберкIес дигусилис ташмишдеш леббиалли, усаэс гьалаб ил у чуйнара бучIа. Или баралли гIячихъли жаваб багьес вирар секьяйда баралли гIяхIсил, яра муэрлизиб чебиу.

АЛЛАГЬЛА ﷻ ДУРХЪАТИ УМИ